Fiscal Zamira Paesch, di Ministerio Publico:
ORANJESTAD (AAN) – Fiscal Zamira Paesch a elabora tambe riba kico ta para den ley pa loke ta trata accidentenan di trafico cu consecuencia fatal, unda un persona fayece.
Fiscal Paesch a splica cu den tur caso, Ministerio Publico conhuntamente cu KPA ta cuminza un investigacion. Esaki ta e investigacionnan cu ta tuma mas tempo, pasobra nan ta mas tecnico. “Nos mester wak eigenlijk, kico ta e ‘voordracht’ di cada partido pa cu e accidente aki. Dus, e ta e investigacion cu mas ta tuma su tempo”, Fiscal Paesch a indica.
El a subraya cu tur investigacion ta wordo haci cu e atencion suficiente, y despues di esaki polis ta entrega e process verbal na Ministerio Publico, un biaha mas, y OM ta evalua esaki y ta tuma un decision.
“Hurisprudencia ta hopi amplio over di esaki. Por ehempel morto den trafico. Pasobra den boca di hende, den nos vocabulario diariamente, nos ta bisa: ‘ok, un hende a ocasiona un accidente, e ta culpabel’. Pero culpa, pa locual ta ley, ta hopi mas cu djis ocasiona un accidente. E ta un parti di full un experticia riba su mes, unda cu e ta exigi, eigenlijk, pa bo a actua relativamente, of sumamente, iresponsabel”, Fiscal Paesch a indica.
El a agrega cu “no por bisa cu un infraccion, por ehemplo, ta suficiente pa papia di culpa; tampoco dos infraccion”, segun nos leynan di trafico.
El a señala cu hurisprudencia ta pidi pa wak e accidente den su totalidad, pues wak cual ta e rol di cada partido pa cu e accidente aki.
Kiermen, no tin cu wak solamente e actuacion di e esun cu ta conductor di e auto, pero tambe e actuacion di e peaton. “Pasobra na momento cu bo ta un peaton canando riba caminda publico, bo ta formando parti di e trafico; peatonnan tambe tin nan obligacion. Pues, atrobe, si algo pasa cu bo ta envolvi den un accidente e suplica ta pa keda para, warda polis”, fiscal Zamira Paesch a relata.
