Su panaderia a sali e ‘Best Bakery Shop of the Year’
ORANJESTAD (AAN): Ya caba Diaranson siman pasa, DIARIO a haci mencion cu un panaderia na Aruba a logra haya 2 premio balioso den Caribe pa nan logro den nan meta, y di nan producto.
Awe den DIARIO ta bay un tiki mas profundo den e gran exito di T2 Sourdough Boutique cu ta situa den Caya Taratata, hopi cerca di e rotonde di Avenida Nelson Oduber, pariba di Hospital.
Lectornan di DIARIO ya sa cu nan ta e principal laboratorio y panaderia artesanal di sourdough na Aruba, a logra un remarcabel dobel victoria na e prestigioso Caribbean Baking Awards na St. Maarten, treciendo cas maximo honornan den dos categoria principal.
(*) Professional Excellence Category: Aki el a haya premio di Best Bakery Shop of the Year.
(*) Specialty Baked Category: Aki el a haya premio di Best Bread or Dough-Based Product.
Funda door di Zaida Everon, kende ta sommelier certifica den panaderia y ex-docente di Biologie, T2 Sourdough Boutique a redefini e panorama culinario di Caribe via di un fusion unico di ciencia biologico, tecnicanan artesanal di fermentacion prolonga, y standardnan halto di calidad. E dobel reconocemento aki ta pone spotlight riba e dedicacion di e panaderia pa excelencia tecnico, e seleccion riguroso di ingrediente, y un experiencia di clientenan di prome nivel.
“E reconocemento aki nos debe na un ekipo dedica y e comunidad increibel cu ta sostene nos tur dia,” ta loke Zaida Everon, fundador y director artistico a declara. “Pa gana tanto den categoria di Excelencia Profesional y tambe di Productonan Horna Specializa no ta djis un etapa pa T2, sino un momento di orguyo pa Aruba. E ta demostra cu, ora bo ta combina un pasion profundo pa ciencia cu un disciplina di elite y sin concesion pa cu calidad, e productonan artesanal di clase mundial por prospera aki mes den Caribe.”
E premio di ‘Caribbean Baking Awards’ ta evalua e mihor establecimentonan culinario di henter region encuanto calidad di e productonan, consistencia, inovacion tecnico y excelencia operacional. T2 Sourdough Boutique a destaca entre su competidornan regional pa su standardnan riguroso, cu ta varia for di mansa di sourdough di fermentacion largo traha cu ingredientenan tradicional di prome calidad te na su operacionnan sostenibel y cu tur respet na medio ambiente.
E logro grandi aki a bin durante un aña trascendental pa T2 Sourdough Boutique, caracteriza pa reconocimentonan na nivel mundial, incluyendo un premio di 2-Star Superior Taste Award di International Taste Institute na Bruselas. Y tambe cu na Aruba nan ta sigui expande e facilidad pa atende su clientela creciente tanto local como internacional.
