ORANJESTAD (AAN): Fundacion Epilepsia Aruba ta orguyoso di anuncia e lansamento di su programa di television nobo,
“Bo No Ta Bo So”, cu lo cuminsa transmiti Diamars dia 4 di augustus 2026 riba Telearuba pa 8:45’or di anochi.
E programa su meta ta pa brinda informacion confiabel, crea mas comprondemento y aumenta conciencia tocante epilepsia den Aruba. Pa medio di combersacionnan habri y educativo, televidentenan lo por conoce mas tocante e condicion, kibra e mitonan y tende historia real di personanan cu ta biba cu epilepsia y di nan famianan.
Durante e diferente episodionan, e programa lo conta cu participacion di mediconan, specialistanan, personanan cu ta biba cu epilepsia, y mayornan cu tin un yiu cu epilepsia, compartiendo nan conocemento, experiencia y conseho.
E programa lo ta presenta pa Jasmin Wever, PR di Fundacion Epilepsia Aruba, na nomber di e fundacion. Cu cada episodio, e fundacion ta spera di yega na mas hende cu informacion correcto y haci comunidad mira cu epilepsia ta un condicion cu por wordo compronde y no temi.
Fundacion Epilepsia Aruba ta invita tur miembro di comunidad pa sintonisa “Bo No Ta Bo So” tur diamars, 4 di augustus pa 8:45 di anochi na Tele Aruba y comparti e programa cu famia y amigo nan. Sea cu bo ta biba cu epilepsia, bo tin un ser keri cu epilepsia, of simplemente bo kier siña mas, e programa aki ta pa bo.
Fundacion Epilepsia Aruba kier expresa un danki special na Tele Aruba y su director Giovanni Kock, pa e oportunidad y confianza pa haci e programa aki realidad. Tambe un danki grandi na Leo Vrolijk, productor di “Bo No Ta Bo So”, y henter e team di Tele Aruba cu a traha hunto cu e fundacion durante e preparacion y grabacion di e programa.
Pa mas informacion, sigui Fundacion Epilepsia Aruba riba Facebook y Instagram. “Bo no ta bo so.”
