Departamento di Salud Publico Aruba
ORANJESTAD (AAN): Dia 24 di januari 2025, Departamento di Salud Publico di Aruba (DVG) di manera oficial a publica den Landscourant un linea di maneho pa cu produccion y maneho di zonido na bienestar di e salud di e oido.
Pa hopi aña DVG conhuntamente cu diferente otro stakeholder a concientisa comunidad riba proteccion di nan oido y e uzo di earplugs durante actividadnan musical. Awor ta momento pa companianan di zonido tambe uni na e causa importante aki y reduci nan zonido na nivelnan saludabel pa e oido di empleado, espectador, hoben, mucha y nos grandinan. Den un solo palabra, na bienestar di nos tur.
Aruba ta den pleno celebracion di Carnaval, un periodo conoci pa tin diferente actividad musical sea den aire liber of den espacionan interior. Sea cual sea e ocasion, pa tur escenario DVG ta duna conseho riba produccion di zonido den su linea di maneho cu por wordo download for di riba nan website www.dvg.aw .
Cuido di e oido di nos comunidad ta rekeri accion di doño di curpa pa bisti su earplugs, pero tambe eta rekeri compromiso y colaboracion di tecniconan, companianan di zonido, dj y demas organisacionnan manera entre otro musicolo cu recientemente a bin ta organisa of para na eventonan produciendo zonido. E yamado ta na tur pa yuda cuida nos oido manteniendo e decibel na 85dB, di e forma aki nos tur por disfruta di un dushi temporada di Carnaval sin daño na nos oido
