E ta traha como Hefe di Departamento di Catalog
ORANJESTAD (AAN): Diabierna ultimo, durante celebracion di Dia di Biblioteca, directora di Biblioteca Nacional, Sra. Astrid Britten hunto cu coleganan a rindi un homenahe bon mereci na Sra. Michele Roos, kende ta celebra 45 aña di servicio.
Sra. Roos a bisa den entrevista cu DIARIO cu actualmente e ta traha como hefe di Departamento di Catalog y na Augustus e ta bay haci 45 aña di servicio na biblioteca. El a cuminsa na aña 1980. El a caba cu scol y un par di dia despues el a cuminsa traha.
Su hobby semper tabata lesa buki y ora cu el a traha e oportunidad pa traha na biblioteca el a sinti masha contento mes pasobra esey ta locual e gusta. E tempo ey el a cuminsa traha na balie y despues di a sigui un opleiding di gobierno, el a bay traha den departamento di Catalog unda despues el a bira hefe di e departamento.
Varios cos importante a sosode durante henter e tempo aki. Biblioteca a cuminsa na Wilhelminastraat y el a experencia e mudamento, por ehempel, pa e edificio nobo. Pa e personal esaki a nifica un cambio hopi grandi, a expresa, muda pa George Madurostraat cual ta e edificio actual y cu den transcurso di tempo tambe a conoce algun cambio.
El a referi tambe entre otro na e proceso di cambio di haci tur cos manual te na e proceso di automatisacion y digitalisacion cu a tuma lugar exitosamente na Biblioteca Nacional.
Sra. Roos a splica kico su trabao ta encera y el a bisa cu nan ta percura pa bestel e bukinan cu mester. Nan ta haci e inclusion di e bukinan den e sistema automatisa pa e publico por haya e bukinan y tur e informacion bek pa medio di e buskeda online ya sea pa medio di autor, titulo di un buki of tema.
Ademas di esey, e departamento ta parti den diferente trabao. Un grupo ta hinca e informacion di e bukinan den e sistema, otro ta traha riba e etiketanan y otro ta encarga cu bestel e bukinan.
Tur cos cu tin cu haci pa e buki por wordo fia na publico ta wordo haci na e departamento di Catalogus. Nan ta traha pa biblioteca central como tambe pa e filialnan, Sra. Roos a splica.
E 45 añanan aki tabata uno hopi inspirado ya cu el a crece hopi como persona. "Cada dia mi ta siña algo extra y mi a siña hopi tambe. Bo ta conoce hende, topa coleganan. Tin coleganan cu a bay, tin coleganan cu no t'ey mas. Bo ta conoce diferente hende, diferente caracter", a bisa.
Finalmente, Michele a laga sa cu ainda e tin dos aña mas prome cu e baha cu pensioen, te na 2027 y aworaki e ta custumbrando cu mes cu esey ta bay pasa. "Cuarenticinco aña ta hopi aña di bo bida y mi a crece como persona y awo mi tin cu bay laga esey atras".
Ora e baha cu pensioen, a expresa, e kier bay traha riba su hardin, e kier tin tempo pa su mes, pa su casa, yiu, su nieta y tambe biaha.
"Mi ta gradici tur esnan cu a aprecia mi, tur esnan cu a duna mi e oportunidad pa ta unda mi ta y cu a yuda mi crece den un trabao. Mi deseo ta pa biblioteca por sigui desaroya hunto cu e generacion nobo y con mundo ta bayendo", asina Sra. Michele Roos a finalisa e entrevista.
