'Youth Art Explosion' cu Evelyn tabata un exito rotundo

ORANJESTAD (AAN): Diasabra 27 di April, Dia di Rey, Lider di MEP, Evelyn Wever-Croes a organisa e prome Youth Art Explosion cu participacion di 20 hoben.

Pa un dia e sala di Cede di MEP a wordo converti den un studio di arte y asina e hobennan por a mustra nan creatividad y pasion pa e arte di pintamento hunto cu lider di MEP.

            Desde varios dia prome cu e evento ya cuponan a yena y riba Diasabra Dia di Rey, trempan e hobennan tawata warda ansioso pa cuminsa mustra nan talento. E atardi aki a cuminsa unda e mandatario a duna algun instruccion cortico y a mustra algun ehempel y mesora e creatividad di e muchanan a los y e resultado final tawata espectacular.

            E idea principal tras di e evento aki tawata pa MinPres por comparti su conocimento di pinta cu e hobennan y tambe pa pone luz riba e talento di cada hoben y duna nan e atencion mereci y asina poco poco nan mes lo descubri nan talento artistico y na final di e dia aki por a wak esaki luci den e bunita obranan di arte.

            Lider di MEP a keda hopi contento di por a comparti y combersa cu e hobennan aki y na final di e evento a expresa cu el a keda impresiona cu tanto talento cu tin na Aruba den hobennan y na peticion di e hobennan sigur lo ripiti e evento aki den futuro. “Danki na mi ekipo cu a yuda mi, y principalmente danki na tur e muchanan cu a asisti. Boso tin hopi talento y nos a goza hopi. Tawata un placer di por a comparti arte y combersa cu boso”, lider di MEP a expresa.