Rotaract Club of Aruba ta presenta
ORANJESTAD (AAN): Rotaract Club of Aruba ta presenta e di 11 edicion di YOU Inc. Seminar 2026: Orange Economy, cu lo tuma lugar riba diabierna, 5 di juni 2026, di 7:00 PM pa 9:00 PM, na Aruba Bank Parking Lot na San Nicolas.
E edicion di e aña aki lo pone enfoke riba importancia creciente di Orange Economy, tambe conoci como economia creativo. E seminario lo trata con creatividad, talento, propiedad intelectual y emprendemento por contribui na futuro di Aruba. Bou di e lema “Protect Your Creativity, Own Your Future”, YOU Inc. 2026 lo reuni creativo, emprendedornan, profesionalnan y hoben lider pa un anochi di inspiracion, dialogo y conocemento.
Despues di varios aña di organisa YOU Inc. den un ambiente di ballroom, Rotaract ta introduci un concepto nobo pa 2026: un seminario den aire liber na San Nicolas, capital di arte di Aruba. E concepto nobo aki ta refleha e tema di e evento y ta crea un ambiente fresco, accesibel y central riba comunidad pa tene conversacionnan tocante creatividad y futuro di industria creativo na Aruba.
E programa lo enfoca riba tres topico principal: Monetizing Creativity, Intellectual Property & Business Experience, y The Vision for the Creative Industry. Door di e conversacionnan aki, e seminario tin como meta pa mustra con idea creativo por bira oportunidad real, con propiedad intelectual por proteha y fortifica trabou creativo, y con e sector creativo di Aruba por sigui crece.
E orador principal di e anochi lo ta Lincoln “Dello” Gomez, kende lo guia e conversacion riba Intellectual Property & Business Experience. Su sesion lo enfoka riba importancia di proteha idea creativo, compronde nan balor, y construi un base mas fuerte pa exito creativo y empresarial.
E seminario tambe lo conta cu participacion di diferente bos local den sector creativo di Aruba, entre nan Mauro Caralps, Julissa Ras, Rocco Franken, Sharkk Gario, Ronchi de Cuba, Edjean Semeleer, Armando Goedgedrag, y Tito Bolivar. Nan lo aporta na conversacionnan tocante monetizacion di creatividad y vision pa futuro di industria creativo.
YOU Inc. ta un seminario anual di desaroyo profesional organisa pa Rotaract Club of Aruba. E plataforma aki ta busca inspira hoben profesionalnan, emprendedornan, creativonan y miembronan di comunidad pa pensa mas grandi, desaroya nan mes y contribui na crecimiento di Aruba.
Mientras e proyecto ta drenta su di 11 edicion cu un concepto renoba, Rotaract Club of Aruba ta spera di por conta cu sosten di comunidad pa haci e edicion aire liber aki un experiencia significativo y exitoso.
