Directora Julie Wever:
ORANJESTAD (AAN)-- Directora di FCCA, señora Julie Wever, durante e apertura di Aruba Doet 2026, a revela cu FCCA lo sigui traha den colaboracion cu CEDE Aruba, pa ta mas fisicamente den e barionan di FCCA.
“Esaki pa nos ta un paso importante, pasobra e lo permiti identifica necesidadnan den e residentenan, mas rapido y trece solucionnan hunto pa e comunidad. Manera nos ta bisa, hunto nos ta logra.
“Cu e colaboracion aki entre FCCA y CEDE Aruba, nos por habri un capitulo nobo y importante. CEDE Aruba conoce e necesidadnan den nos comunidad, y hunto cu Universidad di Aruba, FCCA y Aruba Doet, nos por fortalece iniciativanan cu ta promove conexion social den nos barionan, educacion y participacion di e ciudadanonan. Esey ta, exactamente, e tipo di sinergia cu nos mester, organizacionnan cu ta coordina nan forza y experiencia pa logra mas impacto den nos barionan. Mi ta kere firmemente cu e forza di Aruba ta den su capacidad pa traha hunto ”, Wever a manifesta.
Directora di FCCA a expresa cu ningun institucion por haci su so, e trabaonan aki.
“Pero conhuntamente cu Gobierno, Enseñanza, Sector Social y Comunidad, nos por trece barionan unda calidad di bida, ta central. Ta spera cu e colaboracion aki sigui inspira pa sigui construi un Aruba unda tur hende ta con ta y ta central”, señora Julie Wever a subraya.
Finalmente, el a gradici Aruba Doet, tur studiante cu tabata presente, U.A, CEDE Aruba, habitantenan di Seroe Patrishi y tur boluntario pa nan colaboracion pa haci e proyecto aki realidad.
