Yobida fuerte di Diabierna a produci 40 melding na Bombero

Gobierno a core tene reunion cu Crisis Team

• A papia atrobe riba diseño di camindanan 

ORANJESTAD (AAN): E awacero torencial cu a cay na Aruba riba Diabierna, tanto den oranan di mainta, merdia, y tambe atardi a mobiliza hopi personal di emergencia pa bay yuda.

   E yobida di mainta a keda basha, y a inunda basta area di Bubali, Tanki Flip, y casnan cu tin hopi decada sin wordo inunda, a bin haya situacion caminda awa a drenta y laga tur cos paden humedo.

   Den oranan di atardi, e awacero a concentra mas parti Zuidwest di Aruba, y a ocasiona dolor di cabez pa e.o. trafico riba WVB Boulevard, principalmente debi na e plas gigantesco net banda di Paperclip Rotonde di Sero Patrishi rumbo pa Tanki Leendert.

   E mesun anochi ey, Prome Minister Evelyn Wever-Croes a reuni cu e crisisteam na Crisis Management Office (CMO), consistiendo di Cuerpo Policial, Brandweer, DOW y CMO.  Nan a trece e bon noticia cu no obstante tur inundacion, toch ningun situacion a presenta unda e bida humano tabata den peliger.

   Prome Minister a indica cu Brandweer a ricibi alrededor di 40 melding cu a wordo atendi a base di e grado di urgencia. Pa loke ta trata e careteranan e mandatario a splica cu e careteranan na Aruba ta diseña na un forma cu ora tin un situacion asina di awacero duro den un par di ora, e awa ta baha den alrededor di 3 ora. Pa Aruba por tin un diseño di camindanan unda awacero cu cay ta baha den 1 ora, esaki lo trata di un diseño cu un inversion hopi mas grandi.

   Y situacionnan manera esun di Diabierna unda den un par di ora a yobe hopi fuerte, no ta comun na Aruba. Mirando esaki Prome Minister ta conclui cu esey por tabata e motibo cu e tempo cu a diseña e careteranan a opta pa e diseño unda e awa ta baha den 3 ora.

   “Ya di trempan Cuerpo Policial a emiti un boletin indicando e camindanan cu na e momentonan ey no por a transita ya cu e servicionan di emergencia tawata atendiendo cu nan. Ta bon pa remarca cu segun Meteo Aruba e posibilidad ta grandi cu awa lo sigui yobe den e dianan venidero. Pa e motibo aki den nomber di Gobierno di Aruba, mi ta pidi e comunidad pa ta cauteloso riba caminda y ta alerta ora tin yobidanan asina fuerte. Ya na final di e reunion, a base di informacion di e crisisteam, e situacion tawata bou control. Mi ta gradici e crisisteam y tur stakeholder pa nan trabou duro y importante pa e pueblo di Aruba”, Prome Minister a expresa.