Parlamento mester sigui den e direccion y maneho cu e conoce
*Mester cera porta di Parlamento pa delincuente cu pago di Pueblo
ORANJESTAD (AAN) — Dia 6 di December 2024, Pueblo di Aruba ta bolbe acudi na urna electoral pa dicidi pa e personanan cu den su representacion ta dicidi pa e gobernacion di Aruba.
E Trias Politica, e separacion di poder di Aruba, ta sostene e hecho cu Voz di Pueblo ta decisivo den gobernacion di Pueblo cu riba tur tereno ta depende di Parlamento.
Conseho di Ministro ta e grupo di persona cu mayoria den Parlamento ta entrega cu e tarea pa hiba e gobernacion diario di e pais.
Gobernacion di e pais mester ta di acuerdo cu e leynan di e pais y di acuerdo tambe cu deseo di Pueblo di Aruba, loke ta consisti di varios factor cu Parlamento mester tene na consideracion.
Mundo ta pasa den un tempo di cambio, asisti pa medionan internacional cu tin un influencia enorme riba conducta y pensamento di hende y na cierto ocasionnan hasta ta destrui e moral local di un Pueblo.
Den programanan di partido ta bini dilanti loke e partido kier presenta. Pero pa ta franco tin partido cu ta bini cu ponencianan asina inteligente y na nivel asina halto, cu mester di raket pa busca nan contenido den espacio.
E programanan di partido mester papia e idioma di Pueblo, cu mester comprende exactamente loke cada partido ta aspira pero tambe mester wordo respeta unabez Pueblo duna su aprobacion, su voto, na e miembronan di un partido pa representa Pueblo den Parlamento.
Loke sigur ta un disgusto pa Pueblo di Aruba ta e nivel cu cierto politiconan cu kier atencion ta kere cu nan mester mantene.
Demasiado biaha por nota cu e presentacionnan di politiconan den Parlamento ta basa riba atake y destruccion di otro y no riba concretamente kico mester haci na bienestar di e Pais, cu hopi bez mester duda cu nan conoce si scucha loke nan ta trece dilanti.
Na e momentonan aki por nota con decision di un Huez, cu tin sosten di mayoria di Aruba a base di moral di e Pueblo di Aruba, a wordo ignora y solamente eleccion por pone fin na e forma cu Benny Sevinger a sigui duna prueba cu e no ta entrega su asiento den Parlamento aunke Huez a prohibi pa e participa na eleccion.
Parlamento mester actua contra presencia di personanan cu no por presenta comprobante di bon conducta na e Pueblo cu nan ta representa.
Si Gobierno a cay ta debi na e hecho, cu tin partido manera Raiz cu ta di opinion cu Presidente di Parlamento no mester actua cu man fuerte, cu ta algo cu e posicion di Presidente di Parlamento ta exigi.
Ta a base di Ley y regla cu e Presidente di Parlamento mester respeta, un Presidente mester dirigi Parlamento cu ta e organo central di henter gobernacion di Aruba.
Parlamento ta pasa e Leynan na cual Husticia mester tene su mes y ta Parlamento ta scoge e personanan cu ta forma Gobierno cu mester traha a base di Ley y a base di loke a wordo acorda den e Acuerdo di Gobernacion cu mester ta basa riba Ley.
Si dia 6 di December 2024 Aruba ta bay urna electoral, ta pasobra un acuerdo di gobernacion a wordo kibra pa Raiz, cu no a duna muestra di integridad cu ta exigi respet pa acuerdonan cu wordo alcansa.
Kico mal funcionamento di Parlamento por causa pa un pais, a keda demostra den e constelacion di Parlamento eligi na 2009 cu mayoria absoluto di AVP, cu a entrega na Gobierno Mike Eman un suma di 1.6 Biyon cu Parlamento mes no por a controla.
E situacion mundial na e momentonan aki ta caotico y Aruba sigur mester di Miembronan di Parlamento cu por para firme den nan trabou di control di gobernacion y funcionamento di Trias Politica pa asina sigura cu Aruba ta un pais democratico y cu na Aruba ta Ley ta manda.
E firmeza di Presidente di Parlamento ta keda clave den e periodo di gobernacion cu ta exigi pa miembronan di Parlamento ta hende integro cu por duna contenido na democracia, cu ta basa riba integridad!
