ORANJESTAD (AAN): Diamars mainta, yiunan di victimanan cu a perde nan bida cruelmente na januari,
a dicidi di sali duna nan declaracionnan y pa pueblo scucha di nan banda tambe despues di seis luna di fayecimento di nan mayornan, pa aclarea tambe opinionnan cu cierto medionan di prensa a duna entorno e sucedido fatal aki.
Yiu muhe, señora Yhoelly Willems a expresa cu ningun momento famia di e chauffeur iresponsabel, a mustra ningun clase di simpatia cu su famia. Nan no a ricibi niun disculpa di nan banda. Pero si e famia di e dama chauffeur a bay media y noticianan cu no ta cuadra cu e berdad a keda publica.
Pa cuminsa, el a conta cu dia 5 di januari, e medio di prensa 24ora.com a saca un publicacion indicando cu famia di e sospecho a tuma contacto cu famia di e victimanan, bisando cu nan ta lamenta e sucedido y lo para responsabel pa tur e gastonan.
Señora Willems rotundamente ta desmenti esaki. El a declara cu esaki no ta berdad. Nunca famia di e victimanan tawatin contacto cu famia di e sospechoso.
Un otro noticia cu tampoco ta cuadra cu e berdad, ta di Nelson Speed Andrade, di mesun media di comunicacion aki, unda cu el a menciona cu e victimanan no a crusa riba e zebrapad, y na momento di e impacto e chauffeur su velocidad tabata solamente 100 km, y segun Speed, esaki no tawata un velocidad halto. Tambe Speed a indica cu e chauffeur no tawata di e burachi ey.
Aclareando esaki, señora Willems a remarca cu e sospecho a supla 300 UGL, cu ta un nivel mas halto cu e limite legal pa un conductor regular. Ley ta establece cu un persona ta burachi na 220 UGL y su capacidad pa conduci ta keda significativamente afecta.
Segun Willems, ta esakinan ta e tipo di cosnan cu constantemente nan famia mester scucha desde e ‘hit & run’ cruel aki a tuma luga mientras su famia mes a dicidi di keda trankil y laga Ministerio Publico haci su trabou. Pero despues di e entrevista duna door di famia di e sospechoso, nan a dicidi di duna nan declaracion tambe.
E ta haci apelacion na prensa, na tur medio di comunicacion na Aruba, pa pensa prome cu saca noticia of publica imagennan di accidentenan. Principalmente, pa pensa prome cu duna opinion. Y corda cu hopi biaha famianan ta den dolor y prensa por causa mas dolor ora di trece noticianan of opinionnan propio cu no ta cuadra cu e berdad.
