Durante sesion cu gremio sindical di Aruba
ORANJESTAD (AAN)-- Director di Fundacion SIKI, PhD Jayburtt Dijkhoff, a haci e presentacion tocante e tema di HOFA, pa e gremio sindical di Aruba, den un sesion organiza pa FTA.
Den un entrevista cu Matutino DIARIO, Dijkhoff a splica cu el a bay presenta e hechonan, rapportnan y diferente documento informativo.
El a subraya cu tur ta mustra mesun informacion; cu Aruba ya caba ta bayendo den bon direccion sin HOFA, den sentido di reduci e debe nacional, no obstante tin diferente preocupacion. Por ehemplo, un rapport ta bisa cu Aruba tin suficiente placa pa inverti, pero no ta haci uso di dje. “No tin plan, no tin un supervision local pa baha gasto, y inverti caminda mester inverti, y esey ta hustamente loke mi a bin papia awe”, Jayburtt Dijkhoff a indica.
“Si HOFA, berdaderamente manera Raad van Advies mes ta bisa, ta inconstitucional, cu e ta bay contra nos Constitucion, no ta algo cu ningun gobierno ni Parlamento por djis yega firma, sin puntra pueblo di Aruba si mester bin un referendum of un votacion, pasobra e situacion di Aruba no ta carg’e, e pregunta e ora ey ta: ‘Kico e ora?’ Pasobra hopi hende na Aruba, y no t’ami so ta bise pero diferente rapport ta bisa cu nos ta un sociedad di confianza abao ‘low vast’ pasobra e confianza den nos institutonan, den nos Parlamento, den Gobierno, ta hopi abao, y esey ta un hecho. Y nos ta bisa: si e confianza no t’ey, e ora ey kico anto?” Jayburtt ta cuestiona.
El a agrega cu awo nan a bin cu tur e sindicatonan di Aruba, cu ta hunga un rol democratico fundamental den cualkier pais, y sigur na Aruba, pa nos discuti algo cu ultimamente tabata den noticia.
“Sindicatonan ta hunga un rol pa pensa, ‘si esaki no ta completamente na interes di pueblo di Aruba, kico anto? Awe nos a bin discuti kico ta e alternativanan y cu nos por presenta tambe den publico y tambe na Gobierno, cu hopi biaha ta representa ‘sino fono’ A of B, pero esey no ta realidad. E realidad ta cu tin mas opcion, y nos ta bay pa e opcionnan cu ta sirbi y cumbini Pueblo di Aruba”, PhD Jayburtt Dijkhoff a señala.
{gallery}Jayburtt Dijkhoff a presenta tema HOFA cu hechonan, rapport, y otro informacion{/gallery}
