Jayburtt Dijkhoff:
ORANJESTAD (AAN)—PhD. Jayburtt Dijkhoff, durante e sesion tocante HOFA cu FTA a organiza pa e gremio Sindical Dialuna, a expresa “Cla y Raspa” cu nada cu bin di exterior, no ta sirbi pa Aruba cu mester crece organicamente.
Esaki riba un pregunta cu el a haya den entrevista cu Matutino Diario, den sentido cu si Hulanda via HOFA mes tin cu bin pone orden, pasobra e orden no tey mas na Aruba?
El a señala cu e supervision financiero di Hulanda no a pone Aruba bay dilanti.
“Wak Bonaire cu a bay mas integra ainda, pero e Bonerianonan no ta contento. Bo kier wak un prueba palpable, ata nan ey. Berdad nos tin e problema cu na Aruba nos Trias Politica no ta funciona. Nos tin stempel Parliament. Parlamento ta extension di Gobierno, na lugar di control di gobierno. Nos tin dominanza politico hopi fuerte, nos tin tambe, pa colmo riba dje un lazo historico politico cu ainda tey, cu gewoon nos ta lese den Statuto, bo ta wak ultimamente den e comportacion di Hulanda, cu kier haci nos mas dependiente, kiermen ta retonan cu no mester wordo papia eyfo, mester wordo papia den cas. Anto esey ta e punto awe di e sindicatonan, cu aki mes den nos mesun cas, nos tin cu tuma accion den forma di papia di autonomia enberdad riba nos propio responsabilidad. Esey nos ta bay saca afo, pronto tambe”, Dijkhoff a subraya.
El a indica cu no falta mucho pa Aruba tuma un posicion cu of sin HOFA. “Y esey tambe ta un tiki di e urgencia pakico nos a reuni awe. Pasobra ‘Consensus Rijkswet’ anytime cu no tin consensus nos por a ‘geplok’, esey a pasa cu LAft tambe y a pasa cu COHO. Pero ta parce cu e gobierno aki ta pensa cu sin e placa ey, Aruba ta bay den problema. Nos ta bay wak awe den e discusion cu esey no ta e realidad completo. E ta mas compleho cu esey, y mas peligroso ta, cu nos ta kere cu si tur cos ta bin di Hulanda e ta bay ta un regalo di cielo, y nos ta grandemente ekivoca”.
