ORANJESTAD (AAN)/SAN JOSE: Diahuebs anochi DIARIO a ricibi un tremendo noticia. Esaki ta relaciona cu e nombramento di Dr. Jose Mario Sprok como Decano de Medicina na UCIMED (Universidad de Ciencias Médicas) na San Jose, Costa Rica.
Dr. Sprok mes a confirma e noticia aki cu mesa di redaccion y el a expresa di ta hopi contento cu e posicion nobo cu el a haya.
Dr. Sprok, ta un yiu di tera cu hopi aña pasa a bay studia na Costa Rica cu e soño di bira doctor. E añanan a pasa y Doctor Sprok a logra su soño, pero ademas di esey el a yega asina leu cu su estudio y el a bira un di e Ciruhanonan Cardiovascular mas renombra na Costa Rica ocupando e posicion tambe di director na algun di e institutonan medico di e nivelnan di mas halto na e pais centroamericano.
Dr. Sprok a bisa den entrevista cu DIARIO cu e ta cuminsa oficialmente cu su posicion nobo diamars awor dia 3 di Augustus. Esaki ta un posicion di liderasgo, como lider di tur otro decanatonan di e diferente specialidadnan cu ta wordo duna na e universidad, cual porcierto ta su Alma Mater.
DIARIO ta desea Dr. Jose Mario Sprok hopi exito cu su posicion nobo como Decano di UCIMED. Den un otro articulo lo elabora mas di e exitoso carera medico di Dr. Sprok na Costa Rica.
