ORANJESTAD (AAN) – Director di Colegio Educacion Profesional Intermedio (EPI), Ryan Maduro, a papia den conferencia di prensa, den cuadro di e ciclo di reunionnan entre Stakeholders y Formador Evelyn Wever-Croes, tocante su encuentro aki cu Formador.
Ryan Maduro a expresa cu e ta contento cu Colegio E.P.I a haya e oportunidad como e prome di e veld di enseñanza, pa asina por a duna e perspectiva di tanto e puntonan di atencion pa Colegio EPI den un gobierno nobo.
Maduro a bisa cu Formador tabata hopi receptivo y e ta contento di a haya oido riba tur e dilemanan y puntonan cu Colegio EPI ta deal cune.
“E realidad ta cu Colegio EPI, na aña 2022 ta bay cumpli 25 aña di existencia, y basicamente e mensahe tabata hopi cla, cu nos ta na un encrucihada, y decisionnan clave mester tuma lugar, pa sigui desaroya Colegio EPI, pa asina e por sigui brinda su producto y servicio na nos studiantenan y na comunidad di Aruba”, Maduro a señala, agregando cu e reunion tabata hopi producto.
Tabata tin hopi tema cu no a logra di atende pero el a entrega na e Comision hunto cu e Formador material y “bijlagen” pa nan tin informacion y na momento cu tin un minister nobo, combersacionnan mas profundo lo bay tuma lugar tocante Colegio EPI, Ryan Maduro a bisa.
Ryan Maduro a haci un observacion tocante loke diferente biaha ta wordo bisa eyfo, cu tin un limitacion den e mercado laboral, por ehemplo den sector Horeca, pa graduadonan di Colegio EPI haya chens di trabao.
Maduro a bisa cu ora di papia di limitacion, mester tin un estudio, pero no tin ningun estudio haci aworaki formalmente, cu ta duna den cifranan cu evidencia cu tin limitacion di e studiantenan pa cu nan conexion cu e industria.
Director di Colegio EPI a menciona cu regularmente e ta combersa cu e industria y ta scucha di e posible problematica cu lo por tin pa e conexion cu e mercado laboral aki, pasobra Colegio EPI su rol principal ta produci profesionalnan pa e industria. Maduro a subraya cu tin opleidingnan na Colegio EPI cu mester di renovacion. Pero pa yega na renovacion mester di recurso, y pa e ultimo cuater añanan ta recursonan cu e scol no tabata tin pa traha riba innovacion. El a acentua cu no ta solamente recurso financiero pero tambe capital humano.
“Mi tin di bisa si cu e team dinamico cu nos tin na Colegio EPI, mi ta bisa cu ta haci milagro. Nos ta purba tur dia di scucha loke e veld ta bisa nos pa nos sigui mehora”, Ryan Maduro a señala.
