Gobierno y Crisis Team cu actualisacion relaciona cu Covid-19 - *Tur mericano lo mester haci test bek pa drenta Aruba - *Tarifa di seguro mandatorio ta wordo reduci
ORANJESTAD (AAN): Gobierno di Aruba hunto cu Crisis Team a yama un conferencia di prensa riba diahuebs atardi pa asina haci algun anuncio importante.
Mirando e aumento continuo di e casonan di Covid-19 den e dianan aki, a dicidi di tuma algun paso necesario pa contraresta e contagionan cu te cu aworaki tin un average di 42 caso pa dia.
Prome Minister Evelyn Wever-Croes a cuminsa bisando cu e cifranan ta aumentando. E cifranan a redobla den e ultimo dianan y esey ta motibo di preocupacion y pa ta alerta.
El a enfatisa cu ta hopi importante pa para keto cu tin un problema na Aruba. "Awo cu nos tin cu bay bati alarma mesora y pa bay cera Aruba y cera tur hende den cas, no. No ta bay haci esey".
Ta importante si pa cada ciudadano ta alerta cu e virus tey y cu e tey pa haci daño. "Pero ta den nos man pa scoge si nos ta permiti'e haci daño si of no", a expresa.
E mandatario a laga sa cu e situacion na Dr. Horacio Oduber ta stabil. Tin 9 persona interna, di cual 2 ta den Cuido Intensivo y esaki ta algo pa tene cuenta cu ne.
Gobierno no ta bay tuma e medidanan cu a tuma aña pasa na Maart pa cuida cada ciudadano. Ta bisa cada ciudadano cu ta hopi importante pa abo cuida bo mes.
Wever-Croes a finalisa bisando cu ta importante pa vacuna of den caso cu no kier tuma e vacuna pa cuida bo mes.
Algo cu ta bon pa remarca ta cu no ta mira necesario pa haci tapaboca obligatorio bek, pero ta keda na cada persona of negoshi pa uza of pa exigi e uzo di tapaboca, asina Sharline Koolman di DVG a señala.
CAMBIONAN ANUNCIA
Ronella Croes, CEO di Oficina di Turismo (ATA) a laga sa cu e cambionan cu ta bay wordo introduci pa contraresta Covid-19 ta mas tanto den direccion di e sector turismo.
Ta analisa e mercadonan a base di e situacion di e variante Delta y pa cu esaki a dicidi:
- Pa tur pais cu ta di risico halto cu ta riba e lista, pa e maneho di test esaki keda vigente.
- Merca lo cay bao di e nivel di risico halto: entrante 1 di Augustus lo exigi tur bishitante cu ta bin Aruba for di Merca, vacuna of no, pa presenta un test di Covid-19 negativo prome cu drenta Aruba, esaki mirando cu e casonan bao di esnan no-residente na Aruba a bin ta subi, aunke hopi abao ainda, Croes a indica.
- Reduccion di tarifa di seguro mandatorio:
E tarifa di seguro cu tabata $30 lo mira reduccion. Entrante 1 di Augustus e lo bira $15 flat-fee pa adulto. Pa mucha, e seguro lo ta gratis, bao 15 aña.
Den lineanan grandi, esaki ta e cambio den maneho cu a wordo anuncia diahuebs anochi durante e conferencia di prensa di Gobierno y Crisis Team.
