Segun un bon fuente:
ORANJESTAD (AAN) – Segun informacion cu un fuente conoci a comparti cu DIARIO, den e siguiente dianan tin varios costaricense ta bay bin bishita Aruba, probechando un prijs sigur super barata di 280 dollar e ticket.
Un di e paisnan cu no ta usual pa hende di Costa Rica bishita ta Aruba, debi cu e costo di e pasashi a aumenta drasticamente, cu e aerolineanan conoci cu ta haci escala, por ehemplo, na Panama.
Pero e biaha aki ta un aerolinea Mericano cu a saca e oferta, y posiblemente hasta lo tin hende cu tin famia na Aruba cu lo ta biniendo door di haci uso di e prijs sublime aki, y cu kizas no conoce nos dushi isla.
Ta di spera cu e ticonan aki lo goza hopi di Aruba su hospitalidad, su beachnan di santo blanco, su lama cu ta unico, y cu nan logra purba nos cumindanan tipico.
