Minister Xiomara Maduro a splica:
ORANJESTAD (AAN) – Den conferencia di prensa di gobierno, Diahuebs, Minister di Finanzas Xiomara Maduro, a referi tambe na e asina yama “nota di comienzo di aña”.
Minister Maduro a cuminza bisando cu gobierno ta custumbra cu locual ta un nota di fin di aña, den cual na Mei ta informa Parlamento di tur e cambionan cu a tuma lugar durante henter e aña.
E dignatario a señala cu e presupuesto di e aña aki tabata na ora. Dia 1 di Januari ya caba tabata tin presupuesto pa traha cune, di e aña aki, y den e aña hopi cos por cambia, y pesey ta importante pa no ta te na fin di aña Parlamento haya sa sino na un momento hopi mas trempan. Pues prome cu mitad di aña caba, Parlamento lo haya sa si tin algun cambio den e maneho di gobernacion, y si e cambionan aki tambe ta hiba na cambio di presupuesto.
“Normalmente, nos conoce cambio di presupuesto na final di aña, den October ey e ta bay, e mester bay prome cu aña bolter, y nos ta wak cu awo a introduci un nota di comienzo di aña di cual e ora ey, hopi mas adelanta nos ta bay informa Parlamento di e cambionan den presupuesto. Ora bo ta haye mas trempan ta hopi miho pa Parlamento por haci su trabao di control y tambe e por eherce su budget draft”, e dignatario a relata.
El a agrega cu esaki ta su derecho pa por haci cambionan den e presupuesto, y esaki sigur lo yuda den e aspecto aki.
“Esaki tambe ta duna mas transparencia na pueblo, pues pueblo no tin cu warda te na ultimo pa wordo informa di kico ta e cambionan cu ta wordo haci den presupuesto y con fondo publico ta wordo uza pa gobierno. Pues tambe aworaki, pa pueblo sa ki beneficio ta cu ta bira mas transparente cu e parti aki”, Minister Maduro a remarca.
El a señala cu e nota aki ta pa informa, y e cambionan ta bin den e presupuesto supletorio cu ta e parti di cifranan cu tambe lo acompaña e nota aki di comienzo di aña, pa asina aki bay Parlamento pa pidi aprobacion pa algun di e cambionan cu Parlamento mester duna su aprobacion prome.
Minister Xiomara Maduro a subraya cu esaki ta algo nobo y cu ta yuda locual ta e ciclo presupuestario di nos pais, e ta brinda transparencia y ta yuda tambe pa Parlamento por eherce su trabao di control na un miho manera.
