Yate Talika a sali ganador maximo di Billfish Tournament

ORANJESTAD (AAN): Den fin di siman cu a pasa, a tuma lugar na Varadero Aruba Marina e tan spera ‘2024 Release Masters Billfish Tournament’, cu a atrae hasta participante di Curaçao pa evento.

   E biaha aki tabatin yate riba lama cu tabata hasta transmiti nan aventura di piscamento en vivo riba Social Media.  Por a nota cu esaki tabata un competencia intenso y hopi accion riba lama.

   Riba Diadomingo na final di dia, a anuncia e ganadornan.  Prome lugar ta e team di “Talika” cu a gana e premio cash di 10.000 Florin, fuera monton di premio mas.

   Na di dos lugar tin e team di “Alina” cu a gana 5.000 Florin cash cu varios premio.  Na di tercer lugar tin e team “Evelyn” cu a gana 3.000 Florin cash cu varios premio.

   A rindi homenahe tambe na Best Captain kende ta Gregory Paesch di “Talika”.  Tambe a honra Best Angler kende a bira Marao di “Talika”.

   Tambe a honra e ganadornan di e “Wahoo mas Grandi”, “Mahi mas Grandi”, y “Tuna mas Grandi”.

   Pa e dos dianan aki, un total di 133 Billfish a wordo captura y despues laga bek liber den lama.  Riba Diasabra a captura 70 Billfish y despues laga bek liber den lama.