Ya ta 40 Aña caba cu Museo Arqueologico Aruba

ORANJETSAD (AAN): Tabata 40 aña pasa, esta riba un Diadomingo dia 20 di December 1981 un vision a bira realidad.

Museo Arqueologico Aruba a habri su porta na su prome ubicacion na Zoutmanstraat 1 pa asina presenta su herencia arkeologico na publico. Esaki tabata un gran logro pa Aruba y tambe pa Caribe ya cu e tabata un di e prome museonan arkeologico den Caribe.

   Museo Arqueologico Nacional Aruba (MANA) den e ultimo 40 añanan a pasa den un trayectorio cu hopi cambio. A experencia su mudamento di Juancho Irausquinplein pa edificionan monumental historico y moderno den Schelpstraat, cu un sala di exposicion permanente hopi mas amplio y inovativo.

   MANA a encabesa varios exposicion temporario nacional y internacional. A sigui brinda publico diferente evento, cu cua cada bes a sigui haya mas acogida. Ehempelnan ta e diadomingonan di famia, expedicionnan arkeologico, pop-up exponan, tayernan, presentacionnan, festivalnan, programanan educativo y vacacional y hopi mas.

   MANA a supera un periodo scur tempo cu e tabata sera pa dos aña pa publico y a logra su reapertura na November 2019.  Den transcurso di ultimo añanan MANA a conoce otro logro importante manera e catalogo di pinturanan riba baranca, exposicion Lasonan Caribense,  investigacionnan riba tereno di herencia cultural subaquatico. Actualmente ta den ehecucion un estudio doctorado riba  influencia di cambio di clima den arkeologia.

   E conmemoracion di e 40 aniversario di MANA lo consisti di un programacion varia durante 2022 y cu e ehecucion di e Proyecto Manteniendo Herencia Cultural Bibo den Tempo bou guia di curator Renwick Heronimo y lider di proyecto Pancho Geerman.

   Tur resultado tabata y ta posibel danki na e colaboracion cu diferente instancia nacional y internacional, cu sosten di Ministerionan di Cultura y mas cu claro cu e sosten di e pueblo di Aruba. MANA ta felicita y gradici un y tur cu den transcurso di e añanan na un of otro manera a aporta y a sosten’e 40 aña di existencia di MANA ta un logro di henter Aruba!

   MANA ta recorda publico cu salanan di exposicion ta cera dia 24 y 30 di december en conexion cu dianan di fiesta.