ORANJESTAD (AAN): E siman aki Departamento di Impuesto a bin cu un plan nobo pa esnan cu tin dificultad pa paga e suma completo.
Nan ta corda tur doño di vehiculo, cu e fecha final pa locual ta pago di impuesto di vehiculo di motor di e di dos mita di aña 2021 ta 30 di juni 2021. Pa por facilita e contribuyentenan mas tanto posibel, Departamento di Impuesto a introduci e servicio di pago parcial na november ultimo.
Cu e servicio aki e contribuyentenan por haci pago di impuesto di vehiculo di motor delanta den pida pida, aliviando asina e peso financiero cu ta mas grandi ora cu paga e impuesto den un solo biaha .
E condicionnan pa e servicio di pago parcial ta lo siguiente: (*) Ta paga impuesto di vehiculo di motor adelanta. (*) Ta haci e pago pa luna. (*) Ta paga e suma minimo rekeri sea Afl. 50 of Afl. 200 (depende e categoria di plachi). (*) No por paga menos cu Afl. 50 a menos cu e debe (restante) ta menos. (*) Ta haci e ultimo pago mas tarda riba e fecha final.
E servicio di pago parcial ta valido unicamente pa pago di impuesto di vehiculo di motor. Pago minimo ta depende e categoria di plachi.
E pago minimo pa luna ta depende den cua categoria di plachi e vehiculo a worde registra:
Por haci pago di awor caba. Si e contribuyente ainda falta pa paga e segundo parti di impuesto di vehiculo di motor 2021, no ta necesario pa warda te ora e fecha final ta cerca pa cumpli cu e pago den un solo biaha. Na e momentonan aki ainda tin chens cu por haci e pago den 2 biaha. Ultimo pago mester sosode prome of riba dia 30 di juni venidero.
Online Banking:
Alavez Departamento di Impuesto ta recomenda su contribuyentenan pa paga via e sistema di Online Banking di e banconan local, uzando e metodo di “Bill Payment”.
Pa e pagonan online por worde procesa debidamente, ta importante pa inclui e siguiente informacion: (*) Persoonsnummer na cual e vehiculo ta registra. (*) Number di auto. (*) E periodo di cuenta cu ta pagando (por ehempel: jul-dec 2021).
Por acudi tambe na e oficina principal na Camacuri, e MFA-nan of edificio di Post Aruba na San Nicolas.
Cumpli cu e pago na tempo: Cu e sistema di pago parcial, Departamento di Impuesto ta ofrece e contribuyentenan e espacio pa por cumpli na tempo y asina evita gasto extra innecesario cual ta e boet administrativo di 50% riba e saldo di impuesto habri.
Si no cumpli cu e pago na tempo, e boet ta worde procesa y añadi na e debe di impuesto automaticamente riba dia 1 di Juli 2021. Den e caso aki e contribuyente lo ricibi un cobransa adicional (naheffingsaanslag).
