ORANJESTAD (AAN) — Na 1977, na e momento historico den e lucha di Status Aparte di Aruba,
Diputado Daniel Leo na nomber di Bestuurscollege di Aruba a papia di e logro grandi di un Hospital nobo como centro di cuido medico na Aruba, cu nuebe aña despues a bira pais autonomo den Reino.
Renobacion di Hospital tabata parti di e fondo di 1.6 Miljard cu Mike Eman a considera necesario pa loke el a yama “Bo Aruba” y cu e por a bende na Pueblo pa eleccion di 2009 como su strategia pa rebiba economia, loke no a socede.
Den su discutso cu el a tene dia 25 di Maart 2021 pa ATIA, e Presidente di comision di supervision Hulandes CAFt, a bisa cu e decision di Mike Eman pa spart 100 Miyon pa rebiba economia, sigur no ta huicioso na un pais manera Aruba.
Den e rapport di Algemene Rekenkamer Aruba, e autoridad maximo di control financiero di Aruba, riba e uzo di e Fondo “Bo Aruba” ta papia di e proyecto hospital cu Gobierno Mike Eman a realisa y cu finalmente lo a nifica cu durante 29 aña Hospital di Aruba mester paga un huur na pais Aruba di practicamente 700 Miyon Florin den un circulo vicioso di fundacionnan di Gobierno y Gobierno mes, pero cu finalmente Pueblo di Aruba mester paga.
Na final ta Aruba mes ta paga y lo sigui paga sumanan cu Gobierno Mike Eman a logra tene scondi pa Pueblo na 2017, manera rapport di Algemene Rekenkamer Aruba ta trece dilanti.
Un debe enorme na Hospital ta loke hasta Arubianonan cu no a nace ainda a ricibi na 2017 pa un hospital, cu Ministro Dangui Oduber mester a percura pa funciona ora el a haya e encarga di Ministro di Salud Publico.
Den e rapport oficial di Algemene Rekenkamer Aruba, e autoridad maximo di control financiero di Aruba, ya ta wordo trece dilanti cu mester sigui vigila e cifranan pasobra e realisado di e proyecto no a tene consideracion cu den un hospital tin un sala di operacion.
Algemene Rekenkamer Aruba a critica den su rapport cu Gobierno Mike Eman a atende e proyecto hospital sin un “project dossier” cu ta e documento cu ta duna un bista administrativo di real di e totalidad di e proyecto.
Dangui Oduber mester a atende cu e calamidad cu e hospital a bira pa Aruba como un monumento costoso cu holor di Diesel cu tabata afecta personal y pashent. E prome bon yobidanan na Aruba despues di cambio di gobierno na 2017 y entrega di e hospital renoba, a yena hospital cu awa.
Aruba tabata na careda cu asbest peligroso cu a cuminsa kima riba dak, pero e desaster mas grandi a presenta ora a resulta cu e programa di computer no tabata bon sigura y cuido medico di henter Aruba a bira un desaster primitivo ora hende desconoci a penetra den e sistema di computer di hospital.
Maneho di hospital tabata den necesidad di un reorganisacion di gerencia cu a bira realidad na 2020 ora e pandemia Covid-19 a exigi mas cu lo maximo di Hospital di Aruba.
E puestonan importante di entre otro Director General y Director Financiero di Hospital a wordo yena cu personanan cu nos por sostene debi na nan estudio y capacidad demostra.
Tambe e trankilidad laboral, cu tabata afecta e ambiente cu un hospital mester tin, ta importante.
Cu introduccion tambe di Imsan, cu por considera un hospital auxiliar pa prome asistencia pariba di brug, mester conclui cu Minister Dangui Oduber ta conclui su periodo di gobernacion como Ministro di Salud Publico, cu honor.
E hospital cu Aruba conoce awe no ta e hospital cu Ministro Dangui Oduber a hereda na 2017 ora el a ricibi un calamidad yama HOH caminda awe tin un team na trabou, un maneho profesional pa un Pueblo cu pa medio di AZV y belasting mester paga pa mas cu 700 Miyon cu renobacion di HOH a costa sin control y bon administracion como parti di e proyectonan di Bo Aruba di Gobierno Mike Eman cu sigur no a atende cu placa di Aruba manera bon gobernacion ta exigi y rapportnan di instancianan oficial di Aruba y Reino ta trece dilanti.
