Ya pa 61 aña ta celebra dia di Dia di Portugal na Aruba

Conoci como ‘Dia di Luis Vas de Camões’ y ‘Dia di Comunidad Portugues’

ORANJESTAD (AAN): Riba e fecha 10 di Juni, semper ta conmemora e fayecimento di Luís Vaz de Camões, naci 10 di Juni 1580, kende ta considera e poeta mas grandi den lengua portugues, autor di Os Lusíadas.  Esey ta tambe Dia Nacional di Portugal, unda nan ta celebra identidad, cultura y historia di pueblo portugues.

   Desde aña 1978, e ta tambe Dia di Comunidadnan Portugues rond di mundo, pa honra emigrantenan y nan contribucion.  Na Aruba nos ta recordando e di 61 aña di existencia di e celebracion aki.  E grupo di Portuguesnan aki den un forma hopi emocional a bini hunto p’asina gradici Aruba pa e bon aceptacion di e Portuguesnan na e isla.

   Festival di Canto na Portugues: E aña aki no por keda sin celebra! Nos ta invita tur comunidad pa participa den 3 dianan di celebracion dedica na Dia di Portugal, Luis Vaz de Camões y e Comunidadnan Portugues nan rond mundo.

   E prome ta awe Diasabra, 6 di Juni 2026 cu e ‘Festival Canto na Portugues’ cu lo ta na Club Primavera, cuminsando 8:00 p.m.

   Asina ta habri e celebracion cu un espectacular Festival di Canto na Portugues, unda 9 participante lo mustra nan talento interpretando canticanan na idioma portugues.  E anochi lo ta acompaña pa musica bibo di Biba Lekker Band, creando un ambiente unico yen di cultura, emocion, tradicion y orguyo portugues. E participante nan lo comparti storia, recuerdo y mantene bibo e espiritu portugues na Aruba.   E ta un programa cultural special cu hopi sorpresa.

   E anochi aki por purba tiki di gastronomia Portugues, esta no por falta e delicianan culinario portugues manera Bacalhau tradicional, Espetada à Portuguesa, y cosnan dushi tipico portugues. Bin disfruta di un anochi especial cu famia, amigonan y comunidad, celebrando nos herencia y cultura portugues.

   Dia di Portugal: Esaki lo bay ta Diaranson, 10 di Juni 2026, cu un Santo Sacrificio di Misa, na Misa Fatima na Dakota, pa 7:00 pm.

   Riba e dia especial aki, nan kier honra y gradici tur e portuguesnan cu a imigra pa Aruba y cu a integra den nos comunidad, contribuyendo grandemente na desaroyo di nos isla. Durante hopi añanan, e comunidad portuguesa a traha duro den diferente sectornan importante, manera refineria di Lago, industria di construccion, agricultura, horticultura y hardin, panaderianan, y negoshinan chikito y familiar.

   Awor cu hopi di nan no ta mas cu nos, nos ta sigui recorda nan cu respet y gratitud. Nan esfuerzo, dedicacion, sacrificio y balornan ta keda bibo den nos curazon y den historia di Aruba.  E comunidad portugues semper a mantene un union fuerte rond di nan famia, nan fe catolico y tradicionnan di Madeira. Nan a crea un comunidad basa riba balornan di trabao duro, humildad, respet y union familiar.

   Tambe nan a pasa nan idioma, cultura y costumbernan na generacionnan nobo. Hopi di nan yiu y nietonan a crece bilingue, papia tanto Papiamento como Portugues, manteniendo bibo e herencia cultural portugues na Aruba.  Na e Santo Sacrificio di Misa, nos lo gradici pa tur loke e pioneronan portugues a logra y contribui na Aruba, y nos lo honra nan memoria cu orguyo y respet.

   Fiesta Cultural: Esaki lo ta Diasabra, 13 di Juni 2026, na Club Primavera pa 8:00 pm.  Un legado di forza y tradicion no ta solamente historia; e ta un fuente di inspiracion pa tur generacion. Durante e celebracion aki, nos ta recorda cu orguyo e dedicacion, trabao duro y perseverancia di e comunidad portugues na Aruba. Tambe nos ta honra e tradicionnan y balornan cu nan a transmiti na nos: biba cu humildad, honestidad, respet pa famia y mantene nos cultura y costumbernan bibo.

  Esaki lo ta anochi di Musica, Baile y Cultura, cu programa special cu Grupo Folklorico Português, Grupo Folklorico Infantil, musica bibo y cancionnan na idioma portugues, ambiente familiar yen di alegria y tradicion.  Tambe lo tin cuminda tipico portugues, y bebidanan tradicional, cos dushi tipico, y mas sorpresa culinario.

   Den nomber di e Directiva di Associação Social Cultural Portuguesa y di e Cônsul Honorario di Portugal, nan ta invita Aruba, comunidad Portugues y Comunidad Luso-Arubano pa uni cu nos den e gran celebracion cultural aki.  Corda cu tur entrada ta gratis, pues yega cu bo famia, amigo- y bo orguyo luso-arubano pa un anochi inolvidabel.  Viva Portugal, Viva Aruba!