Presidente di STA
ORANJESTAD (AAN): Presidente di Sindicato di Trahadornan di Aruba (STA), señor Diego de Cuba, ta di opinion cu pa atende e reto creciente di costo di bida y yuda e famianan cu mas necesidad, mester considera diferente alternativa concreto y sostenibel.
Segun De Cuba, e situacion financiero di hopi trahador na Aruba ta preocupante. El a indica cu un gran parti di esnan cu ta gana salario minimo ta aproximadamente 600 Florin bao di e bestaansminimum. Den e caso di un famia consistiendo di mama, tata y dos yiu, unda ambos mayor ta gana salario minimo, esaki ta 1.600 Florin pa luna bou di e bestaansminimum.
Un di e sugerencianan cu presidente di STA ta propone ta introduci un sorto di vakantie-uitkering, bonus anual of reparatietoeslag obligatorio, cu por representa un alivio financiero adicional pa e famianan cu ta confrontando dificultad economico.
Ademas, De Cuba ta promove e idea di crea un cooperativa di trahadornan. Segun su calculo, si aproximadamente 10.000 trahador participa den un cooperativa y cada miembro contribui cu 100 Florin pa luna, e fondo acumula lo alcansa 12 miyon Florin den un periodo di un aña.
Segun e, un iniciativa asina por crea oportunidadnan pa desaroya proyectonan economico na beneficio directo di e miembronan, manera lanta un supermercado cooperativo, importa productonan na costo mas competitivo y distribui esakinan na prijsnan mas accesibel na miembronan di cooperativa, compara cu e mercado regular.
Segun de Cuba, pa un cooperativa logra exito, ta indispensabel cu e clase trahador haya e educacion y conocimiento necesario tocante e funcionamento y e beneficionan di un cooperativa. Solamente asina por crea suficiente apoyo pa pone e ideanan aki riba pia y contribui pa trece alivio na e problemanan di costo di bida cu ta sigui subi,” de Cuba a declara.
