Minister di Finansas Xiomara Maduro:
*No mester warda te ora e gobierno nobo keda formalisa
ORANJESTAD (AAN): Minister di Finansas, Xiomara Maduro, a duna di conoce diahuebs mainta den conferencia di prensa cu presupuesto di un pais ta e ley di mas importante. "Sin un presupuesto e gobierno no por haci e gastonan cu ta necesario pa asina gobierno por brinda e servicio necesario na comunidad, pero tambe cumpli cu locual ta e obligacionnan financiero".
El a indica cu den caso di gobierno di Aruba tin cu pensa tambe riba e debe cu tin cu wordo paga y pa esey e minister di finansas mester ta autorisa pa Parlamento di Aruba pa por cumpli cu e pagonan necesario. Tambe ta importante e inversionnan y p'esey ta importante pa tin un presupuesto cu ta 'in place' pa asina gobierno por traha cu ne, el a agrega.
Minister Maduro a sigui bisa cu na e momentonan aki Aruba ta den un fase di transicion di gobernacion, pero gobernacion riba su mes mester ta continuacion. Presupuesto di Pais Aruba, conforme ley, a wordo entrega dia 29 di augustus 2024 na Parlamento pa su tratamento.
E momento ey tabatin Eleccion y Parlamento e momento ey a dicidi di no trata e presupuesto ainda te ora cu bin un gobierno nobo.
Aworaki e formacion di gobierno ta tardando hopi y e tardansa ey ta trece den peliger e continuacion cu mester tin riba locual ta e ley di mas importante di Pais Aruba, Minister Maduro a expresa.
Pesey, entre otro, CAft a manda un carta pa Presidente di Parlamento di cual el a urgi pa Parlamento por trata e presupuesto pa asina Minister di Finansas por sigui cumpli cu e necesidadnan financiero pa e debe y tambe pa loke ta trata e inversionnan, e mandatario a remarca.
Pa cu esaki, presupuesto a wordo entrega na tempo aña pasa. Parlamento no a trat'e y p'esey gobierno no a sigui cu e contestacion di e preguntanan cu a bin for di Parlamento.
Ora cu e carta di CAft a yega a sigui cu e contestacion di casi 800 pregunta y Parlamento di Aruba a ricibi e contestanan ey. Banda di esey a entrega un Nota di Cambio, cu tabata necesario door di e cambionan cu ta tuma luga di momento cu ta traha e presupuesto, na april 2024, te na momento cu a entreg'e na augustus 2024.
Tin cambionan di entre otro crecemento economico, reduccion di Inkomstenbelasting, cu mester keda refleha den Presupuesto 2025. A hinca e cambionan aki y otronan den un Nota di Cambio cu Parlamento a caba di ricibi.
Esaki ta nifica cu na e momentonan aki Parlamento tin tur e informacion riba Presupuesto 2025 pa asina nan por trata e ley importante aki, Xiomara Maduro, Minister di Finansas a expresa. No mester warda te ora e gobierno nobo keda formalisa pa por atende e ley aki, ya cu Parlamento mes ta completo.
