Formacion di Gobierno di Aruba den tension mundial anticipa pa DIARIO
*Exigencia Trump y gasto di Defensa di Reino di cual Aruba ta depende
ORANJESTAD(AAN)—A base di contactonan internacional di cual DIARIO ta haci uzo, for di 2023 a haci posibel, pa prepara Aruba pa desaroyonan mundial cu manera a wordo anticipa, lo marca 2025.
Desaroyonan na 2024 solamente a habri caminda pa aceleracion di e epoca di cambio den maneho di paisnan grandi, cu resultadonan pa henter mundo.
Durante e ultimo añanan, instabilidad tabata crece na un forma acelera, mientras tabata parce cu mundo liber lo no wordo afecta.
Na 2024 a yega e momento cu DIARIO directamente a splica Aruba, cu mester tene cuenta cu desaroyonan mundial y cu exigencianan nobo di organisacionnan internacional, cu lo mishi directamente cu realidad di Reino y asina di Aruba.
Uno di e topiconan cu DIARIO a presenta den luho di detaye, tabata e desaroyonan na Europa, caminda Hulanda a cay bou un luz mas grandi na momento cu ex Prome Ministro di Reino, Rutte, a bira Secretario General di NATO, cu ta e organisacion cu a wordo lanta pa proteccion di integridad di paisnan Europeo.
E desaroyonan cu a conduci na existencia di e union cu a bira Europa, awe ta centro di discusion y sigur di tension mientras Donald Trump a asumi poder na Merca y ta mustra henter mundo cu e tempo a yega cu Merca no ta sigui inverti placa na entre otro Europa.
Presidente Donald Trump directamente y pa medio di su representantenan a papia palabra cla y a exigi pa Europa mes pone mas placa riba mesa pa su gastonan di defensa, cu ta nifica cu Hulanda cu ta pais mas grandi di Reino Hulandes, tambe mester tin mas placa pa pone den su propio defensa.
DIARIO a bin ta adverti Aruba, pa e exigencianan cu a presenta durante ultimo temponan pa Reino, cu ta encarga cu defensa di Aruba tambe y mester mira con e ta haci cu e gastonan aki.
E decisionnan cu ta wordo tuma a base di e situacion na Ukraine, ta forza decisionnan den Gobierno Hulandes, cu ya a duna di conoce cu por ehempel riba tereno di asilo politico, e lo baha su gastonan considerabelmente.
Europa na e momentonan aki ta pasa den un situacion digno di atencion di e Arubiano, cu pa su defensa ta depende di Madre Patria Hulanda cu te final di 2024 tabata tin Rutte como su Prome Ministro pero awor tin un gobernacion nobo, mientras Rutte ta Secretario General di NATO, cu mester bay biba cu menos placa di Merca, cu for di Segundo Guera Mundial a duna e siguransa di proteccion di Europa cu a bira basta costoso y segun Presidente Donald Trump, mester wordo reduci.
Actualmente un escalacion di problemanan mundial den cual Europa y Merca cu ta dos pais importante pa Aruba, ta presenta na momento cu eleccionnan cu a tuma lugar na 2024 y no na 2025, a haci cu Aruba ta den formacion di un Gobierno nobo, na momento situacion mundial y Europa y Merca ta centro di noticia.
