Exigencia di Status Aparte tabata e Banco di Aseguro Social di Aruba
*Pensioen di Behez ta directamente mara na sistema financiero Aruba
*AZV apresura cu tabata plan di MEP a causa temblor financiero
ORANJESTAD(AAN)—Cumpra curazon di Pueblo sabiendo cu no por cumpli cu e promesa, ta e descripcion real di e existencia di Partido AVP.
Historia ta duna prueba di e fracasonan politico di AVP pa inicia na e separacion di Antillas Hulandes cu a priminti, te por ehempel e promesa di Mike Eman cu e ta deshaci di BBO como parti di entrada nobo di Aruba, cu a introduci e tempo cambio den su sistema di belasting.
E conkista di e prome Gobierno di Aruba dor di AVP, tabata basa riba e salida di Lago, cu a kita atencion di Pueblo di Aruba for di e logro di Status Aparte di Betico Croes, cu a duna testimonio di e forma profesional cu a prepara Aruba pa bandona Antillas Hulandes y para riba su propio pianan.
E exigencianan di Betico Croes tabata directamente basa riba e cartera di Pueblo cu mester a produci e fondonan necesario pa e parti social di maneho di e pais.
Ta hustamente pa e fragilidad di e sector financiero di un pais, Betico Croes a dicidi cu tur loke ta resorta y ta mishi cu e pakete financiero y monetario, ta den man di Aruba.
Calidad di bida di e ciudadano Arubano, ta depende directamente di e bon maneho financiero, economico y monetario di e pais cu ta dicidi pa tur otro sector.
Sector di Aseguro pues ta un parti integral di alma financiero di e pais y Pensioen di Behez ta un parti di e mundo di aseguro di Aruba.
Un Aseguro Medico General a nace den e pakete social total di MEP, pero debi na e forma cu e tabata mishi cu e alma financiero y monetario di e pais, a keda atras y a cay den man di e prome Gobierno di Aruba, cu tabata di AVP cu a introduci AZV na un forma, cu manera cualkier profesional economico por a adverti, casi a mata sector di aseguro, cu ta parti directo di e base financiero di e pais.
E forma apresura cu a introduci AZV, a pone sector di aseguro pues sector financiero di Aruba, den un sistema historico cu ta prueba di e peligro pa favorece ganashi politico y no tene na un maneho responsabel di e pais.
Pueblo no a realiza e peligro financiero na cual e forma cu a introduci AZV na Aruba, a expone e pais nobo Aruba, cu a acepta un economia a base di hipoteca den cual hasta Reino a interferi na e momento cu Pueblo di Aruba tabata den gara total di e salida di Lago y a pensa cu hamas un refineria lo habri atrobe na Aruba.
Mike Eman mester a gana eleccion na 2009, na ciere di e scandal Fondo Desaroyo Nobo San Nicolas, cu a hiba Ministronan di AVP, dilanti Huez cu condena pa tres di e Ministronan.
Mike Eman a uza BBO cu e lo a elimina, pa e canta victoria electoral na e momento. El a logra bira Prome Ministro, aunke e mes mester a admiti cu e no por a kita BBO, cu tabata parti di un plan total den e cambio di Belasting y no simpelmente un aumento di belasting.
Mike Eman a destrui Aruba financieramente y economicamente. Family and Friends a beneficia, manera rapportnan oficial a trece dilanti, di e forma cu a base di mentira cu por deshaci di BBO, durante su gobernacionnan.
Te awe no tin un splicacion pakico Raiz mester a percura pa caida di Gobierno Wever-Croes un aña prome cu e proximo eleccion.
Un ansha di e partidonan cu ta den Gobierno pa haya e poder cu nan a haya finalmente pa goberna Aruba, ta keda base di pregunta na 2025, ora Family and Friends di AVP sea ta bay Corte Supremo na Hulanda of ta bay prison na Aruba pa e scandal di Avestruz.
Mientrastanto grandinan di Aruba, cu a cay pa e promesa di Mike Eman cu e ta subi pensioen di behez cu 700 Florin pa luna, ta en espera di nan placa, cu no ta bini di e cartera di Mike pero atrobe di e cartera di Pueblo di Aruba, cu atrobe ta den man di Mike Eman.
Informantenan ta indica cu tur tipo di informacion ta mira luz a base di combersacionnan di formacion di un Gabinete nobo di Mike Eman, cu no ta papia di e 700 Florin cu tabata su promesa central den ultimo eleccion.
Ta aumento di 700 Florin di Pensioen di Behez tabata motibo cu Mike Eman a gana eleccion mientras na 2025 cantidad di su family y friends mester bay Prison of Corte Supremo.
Informantenan ta spera cu den e dianan aki porfin bini dilanti kico Mike y Gerlien ta papia cu instancianan entorno e aumento di Pensioen di Behez cu 700 Florin cu segun informacionnan clave di DIARIO, lo tin un impacto enorme atrobe riba e sistema financiero di Aruba, na entrada di AVP den Gobierno despues di Status Aparte, a haya su mes na careda cu un introduccion caotico di AZV, cu tabata proyecto cu MEP a laga atras pa motibo di e impacto enorme cu e lo tabata tin y tabata tin e prome momentonan.
