Carlos Besaril Supervisor Billing & Collection NV Elmar:
*Tin recomendacionnan cu por sigui
ORANJESTAD (AAN)— Carlos Besaril, Supervisor di “Billing & Collection” na NV Elmar, den entrevista cu DIARIO a splica con e cambio climatico ta mustra su efecto riba e sistema di coriente. El a indica cu mas hende ta gasta mas coriente y e ta mira esaki riba nan cobranza.
Besaril a bisa cu tur aña NV Elmar ta enfatiza riba e aspecto cu Aruba tin un clima hopi caluroso, y en principio, no tin un descanso den henter e aña, sinembargo e consumi ta bay den aumento for di Juli p’a dilanti.
“Manera tur aña, nos ta recomenda nos clientenan pa tene cuenta cu esaki mas consumo tambe kiermen mas aumento den bo cobranzanan pa fin di luna. Basicamente, esey ta nos observacion den e periodo nos dilanti”, Besaril a indica.
Tin preguntanan cu ta bin di clientenan di ELMAR, den sentido cu nan ta bisa cu nan no a haci nada diferente cu prome, di con e cobranza ta bin mas halto. El a indica cu manera e calor pafo ta aumenta, automaticamente e sistema di refrigeracion tambe ta bay exigi mas energia.
“P’esey nos recomendacion cu ta mundialmente, pa mantene bo ekiponan, vooral e airco (cu ta esun cu ta haci e consumo mas halto na Aruba), den bon condicion. Cu bon condicion nos kiermen, zorg pa haci service alomenos cada seis luna, zorg pa bo mes haci e filternan limpi regularmente, pa mantene e temperatura entre 22 pa 25 grado. Mi sa cu esey ta dificil pasobra nos kier tine mas frio, pero corda cu mas tanto bo tin abao e temperatura, mas tanto e compresor ta traha, y esey ta consumi mas energia cu na final ta haci bo consumo mas halto”, Besaril a subraya.
El a agrega cu e calor for di Mei ya caba ta inmenso eyfo y tur hende ta experiencia esaki, y un bez mas e recomendacion ta pa consumidor ta conciente, wak den cas si tin caminda cu por haci e uso mas eficiente, si por evita pa aire frio ta sali for di porta, unda tin airco trahando no laga porta habri por nada, mantene e bentananan cubri cu cortina of 'shutter blinds', pa evita cu e solo penetra den e espacio cu bo kier mantene frio.
