ORANJESTAD (AAN): Plan di Mayor a cuminsa cu e programa piloto di KIES pa muchanan entre 6 pa 12 aña di edad.
Plan di Mayor Aruba ta ofrece e servicio di KIES (Kinderen in een Scheiding), KIES ta un programa di intervencion cu a cuminsa na Hulanda na aña 2002 (22 aña di existencia) pa asina profesionalnan por brinda guia y yudansa na mucha y hoben cu tin necesidad di wordo scucha y kier papia tocante e tema di divorcio of separacion di nan mayornan.
Siman pasa diaranson dia 15 di mei 2024 tabata e prome sesion di e programa piloto KIES hunto cu 2 profesional KIES coaches y un grupo di mucha entre edad 7-12 aña. Den total e muchanan lo atende 8 sesion y lo finalisa e intervencion cu un presentacion pa e mayornan.
Plan di Mayor ta contento pa anuncia cu e prome sesion di KIES a bay estupendo unda cu e dos KIES coaches nan por a yuda e muchanan papia tocante nan situation actual.
Tambe, por a wak cu e muchanan a sinti nan mes comodo pa expresa nan mes den forma di pinta y combersa. Ta sumamente contento di por wak con e KIES programa por brinda un yudansa y guia positivo pa e muchanan.
Pa mas informacion tocante e programa KIES por bishita e Facebook Page di plan di Mayor, por bishita e website di Plan di Mayor www.plandimayor.org of por tuma contacto cu nan whatsappline +297 5696871.
