Xavier University a marca historia cu prome klas di Pre-Nursing

ORANJESTAD (AAN): Xavier University School of Nursing (XUSON), hunto cu Xavier University School of Medicine,

a celebra un momento historico pa educacion di cuido di salud na Aruba cu graduacion di e prome klas di su Pre-Nursing Program.

   Durante e ceremonia, cu a tuma luga den auditorio di Xavier University Aruba na Santa Helenastraat, Playa, e studiantenan a ricibi nan certificado pa completa exitosomente e programa. Cu esaki, nan ta eligibel pa continua directamente den e programa Bachelor of Science in Nursing (BSN), marcando un siguiente paso importante den nan formacion profesional.

   Dean of Nursing Bonnie McGowan a duna e palabra di bon bini y a felicita e studiantenan pa nan corahe, compromiso y determinacion. Segun McGowan, como prome grupo di e programa, e studiantenan no solamente a logra un meta personal, sino tambe a habri caminda pa futuro generacionnan. El a enfatisa cu enfermeria ta bay mas leu cu conocemento tecnico: compasion, presencia, amabilidad y capacidad pa scucha ta parti esencial di cuido di un paciente.

    Parlamentario Gino Goeloe tabata e orador principal durante e ceremonia, acompañando e institucion y graduadonan den celebracion di e importante logro aki pa Aruba.

   Chief Academic Officer Dr. Aaron Dubey tambe a dirigi palabra na e studiantenan, recordando nan cu e Pre-Nursing Program ta un puente di un nivel mas halto di preparacion. El a anima nan pa sigui siña, acepta erornan como oportunidad pa crece y trata cada colega y pashent cu respet y dignidad.

   Dubey a destaca cu enfermeria ta “e curason di cuido di salud” y a motiva e futuro enfermeranan pa, despues di nan formacion, sigui contribui na comunidad Arubano cu conocemento, habilidad, empatia y compasion.

   E certificadonan a wordo entrega pa Bonnie McGowan, Dean of Nursing, y Howard Maxwell, Associate Professor, cerando un ceremonia cu ta marca cuminsamento di un etapa nobo pa educacion di enfermeria na Aruba.