Exitoso actividad den luna di Augustus di Hisa Fli na Centro di Bario Playa Pabao

ORANJESTAD (AAN): Recientemente e organizacion di ‘Ban Hisa Fli’ conhuntamente cu ‘Centro di Bario Playa Pabao’ a tene un exitoso evento di Hisa Fli.

   Hisamento di Fli ta un tradicion cu tin un lugar special den nos cultura y cu ta reuni tanto hobennan como adulto. Aunke normalmente e actividad aki ta wordo organiza den luna di April, riba peticion di varios amante di Hisa Fli, Luis Ras a tuma e iniciativa pa ripiti e evento na Centro di Bario Playa Pabao.

   Traha un Fli ta mas cu un hobby; e ta un arte cu ta forma parti di nos cultural y cu mester wordo transmiti na e generacionnan cu ta bin despues. Durante e preparacion y hisamento di fli, hobennan y adulto ta comparti conocemento tocante e materialnan cu ta wordo uza, e tecnica di traha un bon fli y e principio di con un fli ta logra subi den aire.

   Centro di Bario Playa Pabao ta orguyoso di por forma parti di e iniciativa aki y di contribui na e evento special aki.

   Categoria A cu tabata pa Fli entre 205 pa 250 cm di grandura, tabatin ganador prome lugar Abreu.  Di dos lugar a bay pa Reno.

   Categoria B cu tabata pa Fli entre 255 pa 305 cm di grandura, tabatin ganador prome lugar Team di Tarabana.  Di dos lugar a bay pa Abreu.

   Nan ta invita tur e hobennan pa keda pendiente, pasobra otro aña nan lo organiza workshop nan di traha fli pa nan por participa activamente den e gran evento cu lo wordo organiza hunto cu Luis Ras.