ORANJESTAD (AAN): Manera ta conoci, aña pasa apenas cu e pandemia di Covid-19 a cuminza, a bin haya sa cu Excelsior Casino Aruba cu ta den Holiday Inn tabata den problema financiero, ora cu nan no por a paga e ultimo salario di Maart cu nan a traha pe.
Un casino cu tabatin su bishitantenan regular di exterior, y tambe hende local cu tabata hasta bay hunga bingo.
Despues di esey e compania di Excelsior Casino a bati bancarota, y riba di 65 empleado a perde trabao. Algun di nan a logra haya pago via sistema di FASE pa asina por a keda cu cabez riba awa.
Mientras tanto, un otro operador a bin dilanti y a mustra cu nan si ta dispuesto pa habri e Casino aki bek. E potret aki di DIARIO a wordo saca na comienzo di Juli 2021, ora cu a nota cu trabaonan a start den e ex-espacio di Casino, y rumornan a core cu un otro Casino lo bay habri eynan.
E casino nobo a haya e nomber ‘Xanadu Casino’.
Siman pasa den DIARIO a sali un propaganda unda Xanadu Casino a mustra cu nan ta buscando Dealer pa bay traha. Ademas di esey, nan ta buscando Slot Supervisor, Pit Boss, Supervisornan, Operatornan di Vigilancia, Slot Attendant, Waitress, Bartender, Cashier, Hostess, y mas.
Pues cuponan nobo di trabao a habri. No a informa nada si acaso ex-trahadornan di Excelsior lo haya preferencia of no si acaso nan bay aplica.
E potret aki ta uno ora cu na comienzo di Juli a start cu e renobacion pa crea Xanadu Casino.
