Via email nan a haya sa cu nan contract no a worde prolonga - Ya caba a ricibi bon reaccion riba e revocamento aki - Rudy Lampe no a ni preocupa cu cierto asunto
ORANJESTAD (AAN): E situacion di e werksternan trahando den veld di enseñansa parce cu ainda no tin dia pa e caba.
Den fin di siman, DIARIO a haya confirmacion cu diahuebs atardi un grupo di werkster di DPS (Scolnan Publico) a haya un email for di e directora di DPS unda el a informa e werksternan cu nan ta worde kita for di trabao di inmediato door cu nan contract a termina.
Den e email a pidi e trahadornan pa no bay traha e siguiente dia, esta diabierna.
Esaki tabata un golpi basta duro pa e werksternan cu a haya e noticia aki di e manera aki mientras cu e minister encarga, Rudy Lampe, no a worry pa sikiera duna nan un lapso di tempo anticipa pa nan tene den consideracion cu nan contract no ta worde prolonga y cu nan ta bay keda sin trabao.
Den un forma cruel, den oranan di trabao sin cu a spera, e werksternan a bin haya e email aki for di e directora di DPS cu nan ta worde kita for di trabao.
Mesora e informacion a bira conoci pa Prome Minister Evelyn Wever-Croes cu no tabata sa mes riba e decision aki di Minister Lampe.
DIARIO a haya confirma cu Diabierna den Conseho di Ministronan a dicidi di revoca e decision di Minister di Enseñansa demisionario Rudy Lampe cu tabata pretende di laga e werksternan sin trabao.
Esaki sigur tabata un decision inhumano y cu den principio tabata un tema cu a keda pendiente pa e minister di enseñansa nobo den e gobernacion nobo, pero Minister Lampe a dicidi di haci loke e tabata kier haci sin consideracion cu otro hende y sin tene cuenta cu Conseho di Ministronan.
Na su lugar, di inmediato, Minister Presidente cu no tabata na altura mes a haya sa diahuebs ora e tabata na caminda pa San Nicolas pa firma e acuerdo di gobernacion, di e plan makiavelico aki di Minister Lampe.
