Women’s Club of Aruba ta organisa “Steps of Gratitude” Fun Walk & Run

Pa sostene iniciativa 'Dress A Child'

ORANJESTAD (AAN): Women’s Club of Aruba ta invita henter comunidad pa participa na “Steps of Gratitude – 5KM Fun Walk & Run”, cu lo tuma luga diasabra 28 di november 2026 na Eagle Beach.

E actividad ta habri pa tur edad y tur nivel di condicion fisico y tin como meta trece famia, amigonan y comunidad hunto pa un atardi di movimento, conexion y solidarismo. No ta necesario pa bo ta un corredor; cada participante por cana of core na su propio ritmo.

Registracion ta cuminsa pa 4:00 pm y e 5KM Fun Walk & Run ta sali pa 5:30pm, for di parking lot banda di Coco Loco na Eagle Beach. Costo di participacion ta AWG 10,- pa persona.

Cu “Steps of Gratitude”, Women’s Club of Aruba kier anima comunidad pa move, disfruta di un actividad saludabel y, na mes momento, contribui na un bon causa. E fondo recauda cu e actividad lo bai pa sostene Dress A Child, un di e iniciativanan social di Women’s Club of Aruba dedica na yuda muchanan den nos comunidad.

Durante su largo historia na Aruba, Women’s Club of Aruba a contribui na diferente proyecto social y comunitario. E organisacion ta gradici di curason tur persona, compania y organisacion cu durante añanan a sostene su iniciativanan y a contribui na su trabou den comunidad. E sosten aki ta haci posibel pa WCA sigui realisa proyectonan cu ta beneficia nos comunidad.

Women’s Club of Aruba ta extende un invitacion caluroso na henter comunidad pa uni cu nos pa “Steps of Gratitude”. Bin cana, core, disfruta di un atardi cu famia y amigonan y, mas importante ainda, sostene un bon causa. Hunto nos por haci cada paso conta pa Dress A Child.