ORANJESTAD (AAN): Wikipedia na Aruba ta organisa tayer di Wikimedia Commons,
cu lo tuma lugar diadomingo 11 di october 2026, pa 6:30- 8'or di anochi. Den e tayer aki lo siña con pa agrega, describi y añadi metadata na imagen y tambe con pa crea categoria nobo riba Wikimedia Commons. Pa por participa mester registra via e link aki: forms.gle/m6hWyLLrxiVDTbmf9
Crea un cuenta di Wikimedia Commons prome cu e tayer.
Loke ta Wikimedia Commons: Wikimedia Commons ta un biblioteca digital na unda ta warda y comparti imagen, audio, video, mapa, diagram y hopi mas. Sigun e condicion y su licencia. E plataforma aki ta yuda mehora articulonan riba Wikipedia cu contenido visual of audio visual. E ta permiti mundo conoce Aruba no solamente cu texto pero tambe cu imagen of video. Wikimedia Commons ta traha exclusivamente cu licencianan di Creative Commons.
Licencia di Creative Commons = facil pa reuza : Si bo saca un potret, graba un video of crea un pintura, bo ta doño di esaki. Automaticamente bo tin derecho di autor tambe riba e obra. Esey kiermen cu bo por dicidi con ta uza bo obra y ken mag di uz'e. Si un obra no tin licencia di CC, mester pidi e creador permiso apart pa por uza esaki. Esey ta haci dificil pa reuza obra creativo (legalmente). Si bo haci uzo di un licencia di CC, di biaha ta bon cla pa tur hende kico por haci cu bo obra. Esey ta haci cu ta mas facil pa reuza y esey ta stimula creatividad.
