Women’s Club of Aruba ta despedi di Life Member Lilla Williams

ORANJSTAD (AAN): Miembronan di Women’s Club of Aruba (WCA) cu tristeza grandi den curason ta bini hunto awe pa despedi di Señora Lilla Williams cu a sorprende nos cu su partida.

   Lilla Louise Williams a nace 22 di januari 1935 y el a traha te na su pensioen na Post Kantoor San Nicolas y despues el a keda traslada pa Oranjestad. El a bira miembro di nos club na aña 1991 y a keda fiel den su trabao di boluntario te na ultimo. Su amor pa nos grandinan a hib’e traha cu e comision di Welfare unda e tabata bishita y hunga bingo na San Pedro Paviljoen  na Playa, Huize Maris Stella na Savaneta y Centro di Cuido na San Nicolas. E tabata stima nos muchanan y tabata miembro di comision di Dress a Child pa varios aña pa yuda specialmente muchanan di su bario Dakota.

   Lilla tambe a duna su tempo liber na e Comision di Tene Aruba limpi y despues cu Medio Ambiente goes to School. Den tur otro comision di club, Lilla tur ora tabata dispuesto pa yuda boluntariamente. Den e periodo di 1995-1996 bou presidencia di Marilu de Veer, Lilla tabata forma parti di directiva di WCA como Member-at-Large encarga cu e pagina di ‘Sunshine’ pa pone tur noticia alegre y of tristo concerniente miembrecia den e boletin di tur luna.

   Na aña 2022, Lilla a keda reconoci como Life Member den nos club, ya cu el a cumpli 30 aña ta haci trabao di boluntario y tabatin mas cu 80 aña di edad.

   E tabata loyal na e reunionnan general di miembrecia un biaha pa luna. Aki Lilla a haya e nomber di “Sexy Lady” como semper e ta bin bisti masha bunita mes cu matching tas y sapat’i hilchi halto di 10 cm. Lilla su hobby tabata cose y p’esey e mes tabata cose tur su bistinan na e moda actual y segun e tema indica di e GMM. Su tripnan pa New York tabata special pa e cumpra telanan bunita y sapato cu tas cu ta match. Su cashinan tabata yen di sapato y e mes ta bisa cu e ta competi cu e Filipino Imelda Marcos.

   Semper tabata un placer pa mira Lilla cana drenta bisti masha bunita mes y su sapat’i hilchi halto di kita sombre. Sinembargo Lilla tabata un persona masha humilde y agradabel, cu un curason grandi, su cariño tabata contagioso, semper e tabata contento y sin riparo. Lilla, bo a subi bo ultimo vuelo sin buelta, pero bo ta laga atras bunita recuerdonan, tanto pa bo colega miembronan como pa bo sobrinonan stima y resto di famia. Awo nos di WCA cu hopi tristeza ta aki pa despedi di nos Life Member stima. Bo recuerdonan lo keda graba den nos historia y den nos curason. Sigui luci den e hardin di nos Señor. Sosega na Paz, Lilla stima!

   Di parti di tur e miembronan di WCA, nos mas sincero condolencia na su rumannan y respectivo famia, tur sobrino- y sobrinanan. Hopi forsa na boso tur y laga e bunita recuerdonan di Lilla sirbi di consuelo pa boso.