Women’s Club of Aruba ta celebra 89 aña di servicio na comunidad

ORANJESTAD (AAN): Entre nan miembronan stima, a celebra durante reunion general di miembrecia, e grandioso aniversario di Women's Club of Aruba (WCA),

funda 89 aña pasa riba 17 di september 1934. Señora Lucy Smith, esposa di Sr. Lloyd G. Smith, presidente di "Lago Oil Refinery," a organiza e prome reunion na "Lago Clubhouse" den Colony pa 2:30 di merdia. E reunion aki a conta cu 150 hende muhe.

   Un aña despues, riba 1 di october, despues di un eleccion cu voto, e prome directiva a ser instala, cu un presidente, vice-presidente, tesorera, y un secretaria. Tres aña despues, e 'General Federation of Women's Clubs' a invita WCA pa afilia na e federacion, marcando un momento den historia di e club. Awo, e club ta conta cu como 125 miembro dedica na servicio di comunidad.

   Generacionnan di Arubiano a crece cu WCA, presenciando su compromiso duradero na comunidad. Hopi di nos a tende di WCA, y su impacto ta abarca varios generacion.

   Durante e añanan, WCA a emprende diferente proyecto cu a impacta positivamente riba adulto, hoben y mucha. Un di e proyectonan mas grandi ta 'Dress a Child,' un iniciativa anual na december cu ta brinda pa bisti entre 200 pa 250 mucha cu tin mester. Ademas, bishita mensual na Casnan di Cuido pa adulto mayor pa hunga bingo y celebra ocasionnan special manera Dia di San Valentin, Dia di Betico, Dia di Mama y Tata, y sin laga afo Pasco, cu ta un tradicion cu nan ta gusta.

   WCA ta e pionero den loke ta conscientisacion di cancer di pecho, HIV/AIDS, violencia domestico como tambe hopi otro proyecto.

   E directiva actual ta desea di felicita tur miembro cu e di 89 aniversario di club y kier gradici nan tambe pa semper ta dispuesto pa contribui na Aruba su comunidad.  E potretnan ta pa cortesia Emperatriz Perdomo.