Si compara augustus 2023 cu augustus 2022 por wak un crecemento di 5.4%

A.T.A: Resultado di bishitante pa augustus 2023

*Mayoria bishitante a bin for di Merca 

ORANJESTAD (AAN):  Den luna di augustus 2023 Aruba a ricibi un total di 106.185 bishitante “stay-over”. Si compara luna di augustus 2023 cu augustus 2019 - cu tabata e ultimo aña normal di turismo, por mira cu Aruba a recupera 110% di locual a wordo ricibi na augustus 2019, cu ta indica un crecemento di 10.5%. Si compara augustus 2023 cu augustus 2022 por wak un crecemento di 5.4% 

AVERAHE DI PATRONCHI DI GASTO PA CADA BISHITANTE DEN Q2 2023

            Visa Credit card su averahe den gasto pa cada cardholder a yega na un suma di $625 den Q2 si compara cu $667 den Q1 2023. Mastercard su averahe den gasto pa cada cardholder a yega na un suma di $691 den Q2 si compara cu $740 den Q1 2023.

MERCADONAN Y CATEGORIANAN DI ACOMODACION

            Den augustus 2023 78.6% di e total di e bishitantenan “stayover” pa Aruba a bishita for di Norte America, 6.6% a bishita for di Europa, 12.1% a bishita for di Latino America y 2.8% tawata procedente di otro partinan di mundo.

            Mirando e categorianan di acomodacion, den augustus 2023 27.6% di bishitante a keda den hotelnan European Plan, 18% a keda den hotelnan All-Inclusive, 27.3% a keda den Timeshare y 27.2% a keda den otro tipo di acomodacion, conoci tambe como vacation rentals. 

VACATION RENTALS

            Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera.
            Si compara augustus 2023 cu augustus 2022 por wak cu e prijs averahe di e acomodacionnan aki a crece cu 17% for di un prijs averahe di $225 pa anochi na augustus 2022 pa un prijs averahe di $263 na augustus 2023. Si compara augustus 2023 cu augustus 2019, por wak cu e prijs averahe di e acomodacionnan aki a crece cu 63%, for di un prijs averahe di $162 pa anochi na augustus 2019 pa un prijs averahe di $264 na augustus 2023.

            Si compara augustus 2023 cu augustus 2022 por wak cu e ocupacion averahe di e acomodacionnan aki a subi cu 2 punto di porcentahe, for di un averahe di 51% na augustus 2022 pa un averahe di 53% na augustus 2023. Si compara augustus 2023 cu augustus 2019 por wak cu e ocupacion averahe di e acomodacionnan aki a crece cu 10 punto di porcentahe, for di un averahe di 43% na augustus 2019 pa un averahe di 53% na augustus 2023.

            Den caso di entrada, si compara augustus 2023 cu augustus 2022 por wak cu e categoria a genera un crecemento den entrada di 30%. Si compara juli 2023 cu augustus 2019 por wak cu e categoria a genera un crecemento den entrada di 193%.

2023 (Esaki ta e YTD)

            Te cu augustus 2023, Aruba a ricibi un total di 828.629, bishitante “stayover”, esaki ta un crecemento di 6.9%, compara te cu augustus 2019, unda a a ricibi 775,213 bishitante “stayover”. Si compara e prome 8 lunanan di 2023 cu e prome 8 lunanan di 2022, por wak un crecemento di 12.3%, bayendo for di 738.101  bishitante “stayover” pa 828.629 bishitante “stayover”.