Women’s Club of Aruba cu Celebracion di Pasco pa nos grandinan

ORANJESTAD (AAN):  Dia 15 di december ultimo, nos grandinan na St. Michael Paviljoen na Playa a celebra nan lunch di Pasco.

Algun miembro di e comision di Welfare di Women’s Club of Aruba (WCA) a haci entrega di tur locual tabata tin mester pa e celebracion aki y segun Ivy Goeloe, nos grandinan a pasa un rato hopi ameno.

            Dia 16 di december a toca turno na Cas di Cuido, situa na San Nicolas. Yvonne Geerman, guia di actividad, a keda masha contento cu presencia di e miembronan di WCA cu a bin haci entrega di tur cos p’e celebracion, pa anan na nan turno por a celebra cu nos grandinan.

            Celebracion cu nos grandinan a sigui dia 17 di december na Huize Maristella na Savaneta. Aki boluntarionan di WCA a haci acto di presencia cu tur locual tabata tin mester pa nos grandinan por a disfruta di un dushi celebracion di Pasco. Presente na e ocasion aki tabata Norma Brinkenberg, presidente di WCA y varios miembro di e comision di Welfare.           Asina tambe por a admira con Grupo La Escala a sa di deleita nos grandinan cu nan musica y canticanan di Pasco. Studiantenan di EPI Salubridad y Servicio cu ta core stage tambe a yuda anima nos grandinan. Guia di actividad na Savaneta, Roxanne Ras, a keda sumamente contento con tur cos a bay cu animacion di nos grandinan.

            Ta despues di basta tempo, e comision di Welfare a bin haya permiso, specialmente na Huize Maristella, pa tene un celebracion bunita asina cu nos grandinan  y mira nan gosa di bida na un manera saludabel y yen di alegria, semper teniendo cuenta cu tur precaucion. Tambe WCA a coopera cu algun di e grandinan cu tabata tin un deseo grandi di bay dal un trip den bus pa admira e diferente luznan di Pasco. Esnan cu por a bay a keda feliz di por a haci esey.

            E ultimo celebracion a tuma luga diahuebs dia 23 di december y tabata na e Cas pa nos grandinan na San Pedro. Miembronan di comision di Welfare a bay haci entrega di tur cos pa nan por a celebra Pasco eynan cu nos grandinan.