Ta esencial pa mantene e virus aki bao control
ORANJESTAD (AAN): CEO di Oficina di Turismo (ATA), Ronella Croes a duna di conoce cu ta un echo cu cu e variante nobo, Omicron, hopi pais ta sea na cuminsamento of ya caba den un ola nobo di e pandemia di SARS-CoV-2. E desaroyo aki ta cambia atrobe e patronchi di viahe y e plannan di turismo en general. Sin duda esaki tin influencia riba e pilar di Aruba su economia.
Ta esencial pa mantene e virus aki bao control y pa preveni cu contagionan subi – riba e subida cu ya ta fuerte – y otro paisnan desconseha nan habitantenan pa biaha pa Aruba. “Mas contagio = mas pais ta desconseha pa viaha = menos turista. Menos turista = menos entrada.”
Cifranan halto di contagio ta bay man den man cu e conseho negativo pa viaha for di mercadonan di turismo esencial pa Aruba su economia. Un parti integral di e maneho actual di Aruba ta logra mas rapido cu ta posibel pa mas tanto residente cu ta posibel vacuna cu e “booster”.
“Nos ta consciente cu nos ta den e temporada di dianan di fiesta y cu e contagio lo por acelera durante di e dianan aki. Un suplica ta bay na cada ciudadano pa yuda haciendo di nan parti pa mitiga e contagionan awo pa no mester carga e consecuencianan negativo na januari, y e lunanan cu ta sigui,” Ronella Croes a remarca.
El a agrega, “Aruba a logra surpasa expectativanan durante di e pandemia aki y ta sigui conta cu e confiansa di turistanan fiel y esunnan cu ta bishita pa prome biaha. Pa nos por sigui proteha e recuperacion di nos turismo y e recuperacion di nos economia, comunidad henter mester ta dispuesto pa contribui na bienestar general y preveni contagio. Nos lo mira cancelacionnan di viahe pa Aruba, pero laga nos purba mitiga e impacto mas cu nos por.”
