ORANJESTAD (AAN): Cu orguyo Women’s Club of Aruba (WCA) ta anuncia e lansamento di su website nobo, cu ta womensclubofaruba.org.
E plataforma digital aki ta marca un logro importante pa club, ya cu e ta fortifica su compromiso pa empodera e hende muhe y crea un cambio positivo den e comunidad di Aruba.
WCA ta un organisacion cu su metanan principal ta inclui servicio na comunidad, boluntarismo y e progreso di e potencial di e hende muhe. E website nobo cu a wordo lansa ta inclui nos historia y mision, ultimo noticia, actualisacion, proximo eventonan, oportunidadnan pa boluntario, y detayenan di e diferente programa- y servicionan di nos organisacion.
“Nos ta emociona pa lansa e website di WCA, t’un paso padilanti pa nos club. Door di tin un website nobo, lo mehora e presencia di nos club online, hacienda esaki mas facil pa un persona haya nos y intercambia cu nos”, tabata palabranan di nos presidente Norma Brinkenberg durante e lansamento oficial durante e Reunion General di Miembrecia diasabra ultimo.
E creacion di e website tabata un esfuerso di ekipo consistiendo di e ultimo ex-presidente, Milagros Posner y miembro en general, Monique Palm.
Foto pa cortesia di Emperatriz Perdomo
