Director di SABA:
ORANJESTAD (AAN): Diamars mainta durante un conferencia di prensa, director di SABA, Remo Kock a papia tocante e retonan y e trabaonan di e lugar cu awor a bira CMCC y a contesta preguntanan cu tin rond di e lugar cu ta conoci pa duna cuido na nos grandinan y a splica cu e ta mas cu un lugar di duna simplemente cuido, sino tambe ta trata tur tipo di enfermedad cu personanan di edad ta wordo confronta cune.
“Mi tin 8 aña como director di SABA, locual a bira CMCC y mi kier pa hende na Aruba compronde cu si bo tin mester di un cuido di calidad, cu no ta conta solamente pa docter den hospital of otro specialista, esaki ta costa placa”.
Esaki ta conta tambe pa SABA.
Si bo wak e tipo di pashentnan cu SABA tin, ta pashentnan cu tin malesanan complica, esta malesanan cronico cu no ta pasa den un aña y malesanan cu ta fayece di dje, segun Kock.
Durante e conferencia di prensa el a cuminza contesta pregunta cu hendenan den comunidad lo tin duda riba dje.
Kock a cuminza na bisa cu SABA semper a haci su best pa por comunica cu cualkier hende, incluyendo e minister encarga, pa asina busca pa haya un compromiso cu ta na fabor di e clientenan di SABA.
“Bo no por bisa cu den un dia pa otro bo ta dicidi cu bo ley ta cambia y cu bo ta bay elimina un cas di enfermeria”.
E famianan no por haya nan hendenan grandi bek toch?.
E specialismo cu nos tin den cas pa yuda nos clientenan ta hopi specializa.
Nos docternan ta specialistanan geriatrico y bo ta haya esaki den casnan di enfermeria so, segun Kock.
El a papia tambe di e hecho cu hendenan ta specula cu SABA lo a tarda e investigacion di documento pa 7 luna.
Segun Kock, for di comienzo SABA tabata abierto y na dado momento tabata tin un hurista cu mester a bin haci un investigacion y el a ripara cu e no por a haci esaki riba su mes y cu mester a bin cu un accountant.
Sinembargo, prome cu e accountant a bin mester a bin cu un Decreto Ministerial.
“Tur cos a tarda pasobra nos mester a percura pa tur papel ta na ordo y pa esnan cu tin mester di informacion haya e informacion corecto y esey tambe nos a haci”, segun Kock.
El a splica tambe cu e persona cu mester a haci e investigacion a bay cu vakantie pa un luna.
“Pues nan ta bisa cu ta nos a tarda e investigacion 7 luna, pero esaki no ta berdad”, segun e director di SABA.
El a splica cu tampoco ta berdad cu SABA a ricibi e 3 miyon florin for di Directie Financien Arbeid pa e empleadonan.
“SABA a yega du haya placa pa e ‘rechttrekking niveau 3’ y manera cu SABA a haya e placa, nos a transferi e placa pa e personanan en cuestion”, segun Kock.
A loke ta e motibo cu a baha e cantidad di cama, el a splica cu si bo kier un calidad di bida y cuido pa un pashent cu tin un malesa cronico kende tin mester di hopi medicina y un cuido di 24 ora pa dia, mester di docter, enfermero etc. cu ta atende cu nan.
“Pa mas cu dos decada nos ta den e proceso di bira mas profesional, pues pa bisa awor cu ta algo cu SABA ta haci riba su mes, ta algo cu no ta cuadra”.
Tin mester di mas hende pa yuda ofrece cuido di calidad pa e cantidad di pashent cu tin y si no tin suficiente hende pa ofrece e cuido, mester baha e cantidad di cama pa asina e pashentnan cu si tey, di berdad ricibi e cuido di calidad cu nan tin mester di dje, segun e director.
El a sigui bisa cu no por verwacht cu por duna un calidad di cuido na mes cantidad di hende, cu menos placa.
“Nos no a kita hende di trabao, pasobra mi ta para pa mi hendenan”.
Esey ta nifica si cu nos tin cu bay tuma decisionnan pisa den otro areanan, pa tur hende keda cu nan trabao y pa mi keda cu e mesun cuido di calidad pa mi pashentnan, segun Kock.
