Solange Tchong, Vocero:
ORANJESTAD (AAN): Vocero di AZV, Solange Tchong a splica cu ainda e proceso pa loke ta dokter di cas ta keda y si tin cualkier conflicto of cualkier situacion of topico cu e pashent no ta compronde semper ta bon pa papia riba esaki cu e dokter di cas prome.
El a agrega cu AZV ta keda stimula e relacion entre pashent y dokter di cas, cu ta e relacion di mas importante den loke ta cuido medico. E ta enfatisa cu e pashent mester por sinti cu e confiansa di acerca dokter di cas na cualkier momento.
Mester tene cuenta cu un asistente di dokter di cas tambe tin un rol grandi y hopi biaha e ta e man drechi y robes di e dokter di cas. Un asistente di dokter di cas tin un funcion unda e lo aplica 'triage' cu ta un sistema unda ta nan ta haci pregunta cu ta yuda pa haya con urgente e caso di un pashent ta y tambe pa haya sa con lihe ta 'schedule' e pashent pa un afspraak, a bisa.
Esaki ta hopi importante pa tene cuenta cu ne. AZV ta stimula pa ora tin algo cu un pashent no ta compronde pa sea ta puntra directamente na e asistente di dokter of na bo dokter di cas. Mester purba di tin e relacion di mas mihor cu dokter di cas pasobra e ta prome den e liña di cuido, Tchong a remarca.
