Women’s Club of Aruba a honra e miho graduadonan di 2026

ORANJESTAD (AAN): Women’s Club of Aruba (WCA) ta honra e miho graduadonan di tur tipo di scol secundario desde 1940.

E iniciativa aki ta masha importante, ya cu ta duna honor na e miho di e miho graduadonan den nan categoria.

WCA ta motiva e hobennan cu e reconocemento aki, ta nan ta e futuro di nos pais.

Asina diadomingo dia 12 di juli, e ceremonia a tuma luga na La Cabana Beach & Resort Ballroom, cu presencia di su Excelencia Gobernador Alfonso Boekhoudt y distinguida esposa Hanneke Boekhoudt-Koetse, miembro honorario di WCA.  E evento a conta tambe cu presencia di Minister di Enseñansa, Sra. mr. Gerlien Croes y invitado, Sra. Mia Lagare, ESG and Sponsorship Relations Officer di Caribbean Mercantile Bank (CMB), y Sr. Cedrik Sint Jago, Marketing & PR Officer cual ta e sponsor principal di e evento y su invitado. Ta di aprecia cu CMB semper a apoya nos hobennan y ta sponsor e actividad aki, ya pa 25 aña.

MC tabata Hilyann Croes, kende como un profesional hoben a sa di haci e atardi aki uno exitoso.

WCA a invita e graduadonan pa un atardi special, unda Presidente di WCA, Sra. Benita Esguerra, hunto cu nos miembro honorario Sra. Hanneke Boekhoudt y Sra. Mia Lagare di CMB, a haci entrega di nos “Shoco Award” y tur otro premio.

Esnan cu a ricibi honor como e miho graduado di nan categoria ta:
VWO (Colegio Arubano): Evie van der Sloot; HAVO (Colegio Arubano): Jia Tao Zhong; International School of Aruba: Nayna Mirchandani;

EduCampus: Kyanna Semerel; IBERO American High School: Francesco Ceccarelli Faria; MAVO 6 vak (Juliana School): Jayden Orman; MAVO 7 vak (Mon Plaisir College): Amylee Melo Amaya; MAVO 8 vak (Colegio San Antonio): Jekiël Maduro;

EPI Unit Economia / Financieel Administratie: Ayden-George Dirks;

EPI Unit Economia / Business Administration & Control Specialist: Ashlei Leonor;

EPI Unit Salubridad & Servicio / Sociaal Pedagogisch Werker: Gabriela Boekhoudt; EPI Unit Salubridad & Servicio / Verpleegkunde: Kaylee Lake; EPI Unit Ciencia & Tecnologia / Elektrotechniek: Jeandrick Croes; EPI Unit Ciencia & Tecnologia / ICT: Jaquan Geerman; EPI Unit Hospitalidad &Turismo / Hotel & Restaurant Management: Zoëlly Yarzagaray; EPI Unit Hospitalidad &Turismo / Travel & Hospitality Program: Theron Ras; EPB Oranjestad-Niveau Arbeidsmarkt: Maria Torres Quispe; EPB San Nicolas-Monteur Elektrotechnische Installaties (ABO-Opleiding): Dan Charles; Divisie Politie Opleiding & Ontwikkeling: Chandra Gir; Avond VWO: Juan Escobar Rua; Avond HAVO: Sarah Wever;  Avond MAVO (7 vak):  Oriannis Borges Perez; Avond MAVO (6 vak): Valentina Dijkhoff; Openbaar Avond Beroepsonderwijs Aruba / Monteur Elektrotechnische Installaties: Laiyoni Werleman.

WCA a invita Sr. Trent Stanley, Investment Advisor di CMB pa duna su testimonio di su experiencianan despues cu e tabata un Best Graduate di Mon Plaisir College MAVO y Colegio Arubano HAVO. Despues di gradua el a atende University of South Carolina, unda el a gradua cu un Bachelor Degree den Accounting & Finance. El a comparti cu tur presente e retonan cu el a enfrenta y con el a persevera pa yega na su trabou cu e tin awor. Sr. Stanley a finalisa motivando y deseando tur graduado hopi exito.

Invitado special p’e evento aki tabata Byron Lesire, un graduado di EPI. WCA no ta solamente motiva y honra e miho graduadonan, pero ta celebra logro en general. Ta pa e motibo aki a invita Byron pa bin lesa e poema dedica na tur graduado. Byron su trayectoria ta uno largo como un hoben autista. El a cuminsa na Emma School, sigui pa SPO y sali e miho graduado. A invit’e pa un atardi asina algun aña pasa. Despues Byron a caba EPB y Avond Mavo. Awe el a logra su diploma di EPI Economia cu su 26 aña. Su storia ta uno inspirante y pa es motibo aki no tabata tin un miho persona pa lesa e poema titula” Don’t Ever Stop Dreaming your Dreams” di e poeta Laine Parsons. Byron a lesa e poema cu hopi emocion y orguyo, cual tabata na su luga! Mescos cu Byron, e ta muestra di un perseverancia firme.

Nos di WCA ta gradici directiva di tur scol secundario pa a facilita nos cu tur informacion necesario pa traha e lista di  e miho graduadonan y tur mayor of familiar pa apoya nan yiu.  Un danki di curason ta bay tambe na tur e comerciante- y instancianan, cu a coopera pa a haci e evento aki posibel y pa duna cada graduado un regalo hunto cu su award.

Gradicimento ta bay na tur miembro cu a yuda, principalmente na e comision di “Best Student Award 2026” consistiendo di chairman Monique Palm, Marva Solagnier, Diomira Tromp, Mary Droogh, Milagros Posner, Lisi Paris, Marjorie Hsing, Rachel Kraaijvanger y Benita Esguerra. E miembronan di comision y boluntario a duna tur di nan parti, pa haci e evento aki asina special pa e miho graduadonan di pais Aruba.

 Por ultimo, WCA ta felicita tur otro graduado, cu a completa su estudio cu exito!