Women’s Club a tene su AIDS Candlelight Memorial

ORANJESTAD (AAN): E vigilia internacional na memoria di victimanan di AIDS of e ‘International AIDS Candlelight Memorial’ ta un dia cu nos ta conmemora tur e victimanan di HIV/AIDS.

Ta tene esaki tur aña riba e di tres diadomingo di luna di mei, door di realisa un vigilia cu ta conta cu un participacion extenso riba nivel mundial.

   AIDS ta para pa Acquired Immune Deficiency Syndrome y ta un malesa infectuoso cu ta worde causa pa e virus yama Human Immonodeficiency Virus (HIV). Tin dos variante di e virus di HIV, tin HIV-1 y HIV-2 y tur dos por causa AIDS.

   Danki na nos profesionalnan riba tereno di salubridad y dokternan cu ta trata e personanan cu ta biba cu HIV, nos ta recorda nos pashentanan, cu na inicio di e pandemia, a biba cu un escasez di medicamento, ya cu tur atencion tabata dirigi riba e pandemia. Nan a sufri y lucha contra stigmatisacion den un sociedad cu ta cera porta pa nan, door di ignorancia y discriminacion.

   Asina a pasa cu diasabra ultimo durante e reunion general pa miembrecia, Women’s Club of Aruba (WCA) a dedica su invocacion na e ceremonia di cendemento di bela. Esaki tabata na encargo di ex-presidente Bernadette Schouten, kende tabata miembro di varios comision di HIV/AIDS. Na entrada tur miembro a haya un corsage di strik cora, cual ta e simbolo di HIV/AIDS.

   Cuatro bela a worde cendi pa miembronan, cu a representa e 36 añanan di dedicacion pa concientisa pueblo, pero principalmente nos hobennan tocante HIV/AIDS. E belanan tabata di color preto, cora, blanco y berde y ta representa lo siguiente.

   E bela preto ta na memoria di tur esnan cu a perde nan bida door di HIV/AIDS y el a worde cendi pa ex-presidente Mily Henriquez, kende tabata chairman tambe di e comision di HIV/AIDS.

   E bela cora ta pa conmemora tur esnan cu ta bibando cu HIV/AIDS y esaki a worde cendi pa ex-presidente Marva Solagnier, kende pa varios aña tabata miembro di varios comision di HIV/AIDS.

   E bela blanco ta pa conmemora tur esfuerso y educacion di nos comunidad pa cu HIV/AIDS, el a worde cendi pa ex-presidente Ruby Narain, kende pa varios aña tabata miembro di e comision di HIV/AIDS y ta chairman di varios Comision di Salud.

   E bela berde ta simbolisa speranza. Ta spera cu pronto por tin cura y speranza, p’asina nos por mobilisa nos comunidad y pa hunto traha pa un mundo sin HIV/AIDS. E bela aki a worde cendi pa Marjorie Dijkhoff, kende a traha pa varios aña den e comision di HIV/AIDS.

   Despues cu e cendemento di bela a tuma luga, tur presente por a disfruta di un video y a canta hunto e cancion di bela titula ‘Ban yena mundo cu luz’ interpreta pa e hoben cantante di gospel, Tariq Abraham.  E potretnna ta pa cortesia di Emperatriz Perdomo.