Dia 3 di maart 1936 a haci inauguracion di e edificio nobo di Bestuurskantoor.
Pa e Aruba esaki lo ta di tres edificio di Bestuurskantoor. E prome tabata na Paardenbaai 1820-1830, despues Landskantoor na Zoutmanstraat 1 y awor esaki na J.G. Emanstraat 51. Originalmente e tereno aki tabata e prome tereno cu a hunga futbol na Aruba.
Na e momento cu a inaugura edificio ainda no a construi e part west di edificio. Na 1937 a construi e parti west cu tabata destina pa departamento di Posterijen.
E diseño di edificio tabata di Mr. Fernandes di DOW na aña 1934.
Na aña 1933 casa di Gezaghebber Wagenmaker a pone e prome piedra di e parke “ Willem de Zwijger” cu ta keda dilanti di e edificio di Corte.
E edificio situa na J.G. Emanstraat 51 tabata funciona como Bestuurskantoor cu oficina di Gezaghebber, Corte di Husticia,oficina di Posterijen, Bevolking Register en Burgelijke Stand, Accountingsdienst, Domeinkantoor y Openbare Leeszaal.
Pa hopi aña e actividad oficial di Gobierno, aubade, actividad oficial di Aña di La Reina, tabata tuma lugar dilanti di edificio.
Cu tempo e edificio a bira chikito y na 1951 cu e introduccion di Eilandsregeling, Gezaghebber Kwartsz a muda cu su departamentonan pa e edificio actual di Bestuurkantoor na L.G. Smith Boulevard.
E edificio na J.G. Emanstraat a keda den uso pa algun departamento di Gobierno y Corte Comun di Husticia.
Te cu awe e edificio ta den disposicion di Corte di Husticia y a pasa den diferente remodelacion y modernisacion.
Ariba e edificio aki na e entrada principal tin un escudo di Reino cu un leon cu un spada Romano den gara robes y flecha den su gara drechi.
Na e parti ariba di e escudo tin “ Gerecht in Eerste Aanleg” y na e parti abao tin “ Je Maintiendrai” skirbi.
Compila pa Roberto Croes
Nos Historia Nos Herencia
