Director Gino Goeloe:
*Carni cora un bez pa siman of cada dos siman
ORANJESTAD (AAN) – Gino Goeloe, Director di Wit Gele Kruis (WGK), kier mira un poblacion di Aruba, for di mucha te e adulto mayor, biba saludabel. Manera ta conoci WGK cu apoyo di POH, ta hiba un lucha, pa medio di informacion, contra obesidad.
Goeloe ta mustra esey den un entrevista, unda e ta splica kico un cuminda sano ta consisti di dje.
Un cuminda sano ta consisti di aros, salada, galiña, calacuna, of pisca, un pida carni un bez pa siman of cada dos siman, pasobra no ta bon pa come carni cora tur dia.
E ta conseha pa come menos aros, menos batata, hopi salada. Na Aruba tin e custumber di pone hunto aros, batata, banana, salada y e tayo yen.
Goeloe a indica cu POH tambe ta duna conseho tocante alimentacion y nan ta mustra riba un blachi un tanto di man di aros, salada, y carni. Y mas e persona come salada miho e ta pa su tripa tambe, pasobra zetmeel ta algo cu ta bay den bo curpa y e ta tarda pa absorbe y por ocasiona constipacion, y ta haci hopi dificil pa bay toilet. Esaki por wordo evita door di come salada, mas pan bruin cu semia.
Esaki ta algo cu WGK ta keda papia cu su clientenan, pashentnan, pa nan biba un bida saludabel. WGK ta keda persisti den bay scolnan cuminzando na kleuterschool.
