No lubida cu e pandemia tambe a crea retraso:
ORANJESTAD (AAN) -- E prome aña, e proyecto di renovacion di Hospital dr. Horacio Oduber a bay lihe. Edwin Roos, vocero di SOGA a splica cu esaki ta pasobra nan a traha e parti nobo y eynan no ta stroba e operacion den hospital. Asina cu mester a cuminza renova e espacionan existente, eynan e complicacion a bin.
Locual a sosode e ta compare cu renovacion di un cas, ora ta kere cu por kita tal muraya, ora ta bezig ta ripara cu eynan tin un column cu ta wanta e dak y no por kite sin mas, e ta costa extra trabao y extra tempo.
“Anto, asina bo mester wak con e proceso ey a bay. E semper a bay den bon armonia y cu tur stakeholders: SOGA, Gobierno, Hospital y Contratista tabata coopera cu otro, zorg pa hay un prijs bon. Nan por a duna un prijs bon pasobra nan tin tur e ekipo akinan caba”, el a señala.
Señor Roos, a bisa cu prome nan mester a warda pa caba e parti cu tabata den e contrato original, y djey mester a bay na full un destaho nobo, cu probablemente si a busca un otro contratista, lo a costa hopi mas, refiriendo na construccion di e sala di operacion. “Pues asina e proceso a bay. Nos tur, e cuater partidonan cu mi a caba di menciona ta di acuerdo cu el a dura mucho. Pero, ayera mi a sinta pensa: boso a lubida cu tabata tin un pandemia tambe? Bo ta corda, nos no tabata tin mag di traha mes. Y cada siman cu e contratista mester tabata na Aruba e ta cobra un suma substancial pa e ta presente, anto e no por traha pa via di e pandemia”, señor Edwin Roos, vocero di SOGA a señala.
