Wine & Cheese Fundraising Event di SICA tabata un exito

ORANJESTAD (AAN): Soroptimist International Club Aruba (SICA) a celebra cu gran exito su Wine & Cheese Fundraising Event

dia 4 di september 2026 na Zucchini Restaurant. E evento, cu a tuma luga di 7:00 pa 9:00 di anochi, tabata completamente sold out.

   Den un ambiente ameno y acogedor, esnan presente a disfruta di un experiencia special di wine and cheese pairing. E anochi a brinda oportunidad pa reencontra, combersa, hari y comparti, mientras cu tur persona presente tabata contribuyendo na un causa importante pa comunidad di Aruba.

   E fondo recauda durante e actividad lo contribui na continuidad di e labor comunitario di SICA. Entre otro, e organizacion ta brinda charlanan gratuito tur luna, desaroya proyectonan enfoca riba crecemento personal y empoderamento di mucha muhe y hende muhe, crea material di conscientisacion y sostene iniciativanan manera Orange the World, enfoca riba prevencion y eliminacion di violencia contra hende muhe y mucha muhe.

   “Manera un mata di druif, sea den baranca, tera seco of condicionnan duro, nos ta plama nos raisnan y saca forsa pa produci e miho fruto. Asina nos por crea algo excepcional y di gran balor,” presidente di SICA , señora Magaly Maduro a expresa, ilustrando e resiliencia y poder cu por nace ora hende uni rond di un proposito comun.

   SICA ta expresa su sincero gradicimento na tur persona cu a cumpra entrada y participa na e actividad. Nan presencia y sosten a contribui directamente na e exito di e anochi y ta yuda e club sigui ofrece su proyectonan y charlanan na comunidad gratuitamente.

   Un danki special ta bay na Zucchini Restaurant pa ta anfitrion di e evento, y na e comite di fundraising pa nan dedicacion y organizacion.

   Soroptimist International Club Aruba ta sigui comprometi cu su mision di crea oportunidad, concientiza comunidad y promove un futuro den cual tur hende muhe y mucha muhe por desaroya nan potencial den un ambiente sigur y cu igualdad.