Parada di Lanterna tabata grandi y hopi bon anima

Diasabra anochi na Brazil

ORANJESTAD (AAN): Diasabra anochi den cuna di cultura di Aruba, esta den bario di Brazil, a tuma lugar e ‘Parada cu Lanterna 2026”.

    Gruponan a subi caya pa ilumina caya cu Aruba su cultura.  E tabata comienzo tambe di un fin di siman yen di ambiente y un vibe crioyo.

   Den un entrevista cu Chico Harms, el a splica cu e anochi aki nan a sali cu 11 grupo, debi cu muchanan di scol no tey.  E parada a core cu 8 banda musical, y 3 disco, pues e tabata perfectamente anima.  E persona importante di Fundacion Chico Harms a agrega cu tur cos a bay nechi, pero djis a keda pega un tiki debi na trafico pisa di Diasabra anochi.  E parada a sali di Centro di Bario Brazil, bay pa Caya Bernadina Growell, Noord Cura Cabay, Rooi Koochi, Mabon, y regresa Centro di Bario Brazil.

   Algo ta sigur, cu e ta mira cu berdad e Parada di Lanterna a crece hopi, y cada aña ta sigui bay pe.  E gruponan cu a participa e aña aki ta Fundacion Bernadina Growell, Grupo Sonrisa, Brazil den Cunucu y Fundacion Rosea Cultural y Scol di Brazil, Fundacion Pro Cultura, Gucci Dancers, Grupo Enkura, Zjeito Cultural, Grupo Folkloriko Antia y Grupo Solo Korsow, Grupo Alegria ta Nos Cultura, Grupo Antaño, Grupo Cultural Aruba di Antes, y Rabo di Parada.

   Hopi hende cu a bay mira e Parada a keda satisfecho.  Bunita pa mira asina hopi participacion, di hendenan cu ta braza nan cultura.